ހަނިމާދޫ ސްކޫލްގެ ހައިޑްރޮޕޯނިކްސް ޕްރޮގްރާމުން ފުރަތަމަ ފަހަރަށް ލެޓިއުސް ކަނޑައިފި

ހދ. ހަނިމާދޫ ސްކޫލްގައި މިއަހަރުގެ ދަނޑުވެރިންގެ ދުވަހު އިފްތިތާޙްކުރި "ސްކޫލް ހައިޑްރޮޕޯނިކްސް ޕްރޮގްރާމް"ގެ ދަށުން ހައްދާފައިވާ ލެޓިއުސް ފުރަތަމަ ފަހަރަށް ކަނޑައިފިއެވެ.

ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން މަޢުލޫމާތު ދިންގޮތުގައި، މި ލެޓިއުސް ކެނޑުމަށް އެރަށު ސްކޫލްގައި ބޭޢްވި ރަސްމިއްޔާތު ޝަރަފުވެރިކޮށްދެއްވީ ހަނިމާދޫ ކައުންސިލްގެ ރައީސް ޢަބްދުއްސައްތާރު ޙަސަންއެވެ. މި ރަސްމިއްޔާތުގައި ހަނިމާދޫ އެގްރިކަލްޗަރ ސެންޓަރާއި ހަނިމާދޫ ސްކޫލްގެ އިސްވެރިންނާއި މުވައްޒަފުންގެ އިތުރުން ސްކޫލްގެ ދަރިވަރުން ބައިވެރިވިއެވެ.

ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ބުނީ، މި ޕްރޮގްރާމްގެ މައިގަނޑު މަޤްޞަދަކީ ދަރިވަރުންގެ މެދުގައި ދަނޑުވެރިކަމުގެ މަސައްކަތްތަކަށް ލޯބި އުފައްދައި، ދަނޑުވެރިކަމަށް ޝައުޤުވެރިވާ ޒުވާން ޖީލެއް އުފެއްދުމެވެ.

މީގެ އިތުރުން، ދަރިވަރުންގެ މަދުރަސީ ޙަޔާތުގައި ވޭތުކުރާ ދުވަސްވަރު ދަނޑުވެރިކަމުގެ ތަޖުރިބާއާއި ޢިލްމު ލިބިދެވޭނެ މަގު ތަނަވަސްކުރުމަށް ވުޒާރާއިން މަސައްކަތްކުރަމުންދާކަން ވެސް ފާހަގަކުރިއެވެ. އެގޮތުން، ހައިޑްރޮޕޯނިކްސް ޕްރޮގްރާމްގެ ދަށުން ހަނިމާދޫ ސްކޫލްގައި ދަރިވަރުންނަށް މަސައްކަތުގެ ތަޖުރިބާ ޙާޞިލް ކުރެވޭނެ ގޮތަށް ކުޑަ 'ރެއިންޝެޑްއެއް' ޤާއިމްކޮށްފައިވެއެވެ. އެތަނުގައި ހައިޑްރޮޕޯނިކްސް ސިސްޓަމްގައި ފަތްޕިލާވެލީގެ ބާވަތްތަކާއި ކިޔުކަންބާ އާއި މެލަން ފަދަ ބާވަތްތައް ހައްދާނެ ހައިޑްރޮޕޯނިކްސް ނިޒާމެއް ޤާއިމްކޮށްދީފައިވާކަމަށް ވުޒާރާއިން ބުންޏެވެ.

މި ޕްރޮގްރާމްގައި ސްކޫލްގެ ދަރިވަރުންނާއި މުވައްޒަފުންގެ އިތުރުން ސްކޫލްގެ ޕީޓީއޭގެ މެންބަރުން ހިމެނޭގޮތަށް ޖުމްލަ 50 ބައިވެރިން ހިމެނެއެވެ. އަދި މި ޕްރޮގްރާމްގައި ބައިވެރިވާ ފަރާތްތަކަށް، ފުޅާ ދާއިރާގައި ވިޔަފާރީގެ އުޞޫލުން ހައިޑްރޮޕޯނިކްސް ދަނޑުވެރިކަން ކުރާ ގޮތް ބަލައި، ތަޖުރިބާކުރުމުގެ ފުރުޞަތު ފަހިކޮށްދިނުމަށް، އޮކްޓޫބަރު މަހުގެ 16 ވަނަ ދުވަހު ހއ. މާފައްސަށް ތަޖުރިބާ ދަތުރެއް ކުރުމުގެ ފުރުޞަތުވެސް ފަހިކޮށްދީފައިވާކަމަށް ވުޒާރާއިން ފާހަގަކުރިއެވެ.

ވުޒާރާއިން އިތުރަށް ބުނީ، މި ޕްރޮގްރާމްގެ ދަށުން ލެޓިއުސްގެ އިތުރުން ހައިޑްރޮޕޯނިކްސްގައި ކިޔުކަންބާ ހެއްދުމުގެ މަސައްކަތް ވެސް ދަރިވަރުން ޝަޢުޤުވެރިކަމާއެކު ކުރެއެވެ. މިއީ ދިވެހިރާއްޖޭގެ ދަނޑުވެރިކަމުގެ ކުރިމަގު އުޖާލާ ކުރުމަށް އެޅޭނެ މުހިންމު ފިޔަވަޅެއްކަމަށް ވުޒާރާއިން ދެކެއެވެ.