އެމްއައިބީން %54 ފައިދާ އާއެކު 10 ބިލިއަން ރުފިޔާގެ ރެކޯޑް އެސެޓްސް ހުރަސްކޮށްފި

މޯލްޑިވްސް އިސްލާމިކް ބޭންކް (އެމްއައިބީ) ގެ އެސެޓްސް 10 ބިލިއަން ހުރަސްކޮށް، ތިންވަނަ ކުއާޓަރުގެ ސާފު ފައިދާ %54 އަށް އިތުރުވެއްޖެއެވެ.

އެ ބޭންކުން ބުނި ގޮތުގައި މިއަހަރުގެ ތިންވަނަ ކުއާޓަރުގައި ލިބުނު ފައިދާ 82 މިލިއަން ރުފިޔާއަށް އަރާފައިވާއިރު ބޭންކުގެ ތިންވަނަ ކުއާޓަރުގެ މާލީ ރިޕޯޓުގައިވާ ގޮތުން އެމްއައިބީގެ އެސެޓް ވެލިއު ފުރަތަމަ ފަހަރަށް 10 ބިލިއަން ރުފިޔާއިން ވަނީ ހުރަސްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު %34 އިތުރުވުމެކެވެ. މި ކުރިއެރުމަށް ބާރު ލިބިފައިވަނީ މިހާރު 5 ބިލިއަން ރުފިޔާގެ ފައިނޭންސިންގ ޕޯޓްފޯލިއޯ %45 ފުޅާވުމުންނާއި، ޑިޕޮސިޓް ބޭސް %26 އިތުރުވެ 8 ބިލިއަން ރުފިޔާއަށް އަރާފައި ވުމުން ކަމަށް ރިޕޯޓުން ބުނެދެއެވެ. ހަމައެހެންމެ އާމްދަނީ ވެސް %51 މައްޗަށް ގޮސްފައިވާއިރު، މިއީ ރިބާ ނުހިމެނޭ ބޭންކުގެ މާލީ ނަތީޖާ ވަރުގަދަކަން ދައްކައިދޭ ކަމެއް ކަމަށް އެމްއައިބީގެ ސީއީއޯ އަހުމަދު ރިޒާ ވިދާޅުވިއެވެ.

^{މޯލްޑިވްސް އިސްލާމިކް ބޭންކުގެ ސީއީއޯ އަޙްމަދު ރިޒާ ވިދާޅުވީ އެ ބޭންކުން މި ގެންނަ ޒަމާނީ ބަދަލުތައް ކަމަށާއި ބޭންކިންގެ ޚިދުމަތް ރައްޔިތުންނަށް ފަސޭހަކޮށްދެމުން ކަމަށް.}

އެމްއައިބީގެ ސީއީއޯ އަހުމަދު ރިޒާ ވިދާޅުވި ގޮތުގައި މި އަހަރުގެ ހުރިހާ ކުއާޓަރެއްގައިވެސް ބޭންކަށް ބޮޑެތި ކުރިއެރުންތަކެއް ވަނީ ލިބިފަ އެވެ.

ރިޒާ މި ކާމިޔާބީ ނިސްބަތް ކުރެއްވީ ބޭންކިން ޚިދުމަތް އާންމުންނަށް ލިބޭނެ ގޮތް ހެދުމުގެ މަގުސަދުގައި ބޭންކުން މިހާރު ކުރަމުންދާ ޒަމާނީ ކުރުމުގެ މަސައްކަތްތަކަށެވެ. "އަޅުގަނޑުމެން މި ގެންނަ ޒަމާނީ ބަދަލުތަކާއެކު ބޭންކިންގެ ހިދުމަތް ރައްޔިތުންނަށް ފަސޭހަކޮށްދެމުން މިދަނީ ނަތީޖާ ވަރަށް ރަނގަޅު ކަމުން،" ރިޒާ ވިދާޅުވި އެވެ.

އޮންލައިން އެކައުންޓް ހުޅުވުމާއި އުޖާލާ ފައިނޭންސިން ފަދަ މުހިންމު ޚިދުމަތްތައް އިތުރުކުރުމުގެ އިތުރުން އާ ބްރާންޗް ހުޅުވުމުގެ ސަބަބުން އެމްއައިބީގެ ކަސްޓަމަރުންނަށް ބޭންކިންގެ ހިދުމަތް ފަސޭހަވެއްޖެ އެވެ.