ޕްލާންޓް އެންޑް އެނިމަލް ކަރަންޓީނުގެ ޚިދުމަތްތައް އިތުރަށް ހަރުދަނާކުރުމަށްޓަކައި މުހިންމު މަޝްވަރާ ބައްދަލުވުމެއް މިއަދު ބާއްވައިފިއެވެ.
ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ އިސްނެގުމުގެ ދަށުން ބޭއްވި މި ބައްދަލުވުމުގައި އެ މިނިސްޓްރީގެ އިތުރުން މޯލްޑިވްސް ކަސްޓަމްސް ސަރވިސް، މޯލްޑިވްސް ޕޯސްޓް ލިމިޓެޑް އަދި މޯލްޑިވްސް ޕޯޓްސް ލިމިޓެޑްގެ އިސްވެރިން ބައިވެރިވެވަޑައިގެންނެވިއެވެ.
ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން މަޢުލޫމާތު ދިންގޮތުގައި، މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ޕްލާންޓް އެންޑް އެނިމަލް ކަރަންޓީނުގެ ޚިދުމަތްތައް އިތުރަށް ހަރުދަނާކުރުމާ ބެހޭ ގޮތުންނެވެ. މީގެ އިތުރުން، މުއައްސަސާތަކުގެ މެދުގައި މަޢުލޫމާތު ޙިއްޞާކުރާނެ ހަރުދަނާ ނިޒާމެއް ޤާއިމުކުރުމާ ގުޅޭގޮތުން ވެސް މަޝްވަރާކޮށްފައިވާ ކަމަށް ވުޒާރާއިން ބުންޏެވެ.
Advertisement
ވުޒާރާއިން ބުނީ މުއައްސަސާތަކުގެ މެދުގައި ގާތް ގުޅުމެއް ޤާއިމުކުރެވި، މަޢުލޫމާތު ބަދަލުކުރެވޭނެ ހަރުދަނާ ނިޒާމެއް އޮތުމަކީ މި ޚިދުމަތްތައް ފުރިހަމަ ގޮތުގައި ފޯރުކޮށްދިނުމަށް ކޮންމެހެން ބޭނުންތެރިކަމެއް ކަމަށް ކަމަށެވެ.
މި ބައްދަލުވުމުގައި މި ދާއިރާގައި މިހާރު ކުރެވެމުންދާ މަސައްކަތްތަކާއި ކުރި މަގުގައި ކުރެވިދާނެ ކަންތައްތައް ދެނެގަތުމަށްވެސް މަސައްކަތްކުރެވުނު ކަމަށް ވުޒާރާއިން ފާހަގަކުރިއެވެ.
