އިޒްރޭލަށް ހަތިޔާރު ފޯރުކޮށްދިނުން ހުއްޓުވައިދިނުމަށް އެދި 52 ޤައުމަކާއި ދެ ޖަމްޢިއްޔާއަކުން ސޮއިކޮށް، އެކުވެރި ދައުލަތްތަކުގެ ޖަމްޢިއްޔާ (އދ.) އަށް ސިޓީއެއް ހުށަހަޅާފައިވާ ކަމަށް ތުރުކިއޭގެ ފޮރިން މިނިސްޓްރީން ހާމަކޮށްފިއެވެ.

ތުރުކީގެ ފޮރިން މިނިސްޓަރު ހާކަން ފިދާން ވިދާޅުވި ގޮތުގައި މި ސިޓީ މިމަހުގެ 1 ވަނަ ދުވަހު ވަނީ އދ. އަށް ހުށަހަޅާފައެވެ. ޖިބޫޓީގައި ބޭއްވުނު ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ފިދާން ވިދާޅުވީ އިޒްރޭލަށް ހަތިޔާރު ވިއްކުމަކީ އެ ޤައުމުގެ ޖަރީމާތަކުގައި ބައިވެރިވުން ކަމަށާއި، މިކަން ކޮންމެ ފުރުޞަތެއްގައިވެސް ފާހަގަކުރަން ޖެހޭނެ ކަމަށެވެ.

މި ސިޓީގައި ސޮއިކޮށްފައިވާ ޤައުމުތަކުގެ ތެރޭގައި ސަޢޫދީ ޢަރަބިއްޔާ، ބްރެޒިލް، އަލްޖީރިއާ، ޗައިނާ، އީރާން އަދި ރަޝިއާ ހިމެނެއެވެ. މީގެ އިތުރުން އަރަބި ލީގާއި އިސްލާމިކް ކޯޕަރޭޝަން ޖަމްޢިއްޔާއިން ވެސް ވަނީ ސޮއިކޮށްފައެވެ.

ތުރުކީގެ ރައީސް ރަޖަބް ޠައްޔިބް އެރްދޮޣާން ވެސް ވަނީ މިދިޔަ މަހު އދ. ގައި އިޒްރޭލަށް ހަތިޔާރު ވިއްކުން ހުއްޓުވުމަށް ގޮވާލައްވާފައެވެ. މިއީ އިޒްރޭލުގެ ޖަރީމާތައް ހުއްޓުވުމަށް ނަތީޖާ ނެރެވިދާނެ ގޮތެއް ކަމަށް އޭނާ ވިދާޅުވިއެވެ.

މި މައްސަލައާ ގުޅޭގޮތުން އދ. އިން އަދި އެއްވެސް ބަޔާނެއް ނެރެފައެއް ނުވެއެވެ. ނަމަވެސް، މިފަދަ ފުޅާ ދާއިރާއެއްގައި ބައިނަލްއަޤްވާމީ އެއްބާރުލުން ލިބުމަކީ އިޒްރޭލުގެ ޢަމަލުތަކާ ދެކޮޅަށް އަޑުއުފުލުމުގެ މުހިންމު ފިޔަވަޅެއް ކަމަށް މި ޤައުމުަކުން ބުނާއިރު، އިޒްރޭލަށް ހުޅަނގުން ދަނީ އެހީއާއި މަދަދު ފޯރުވަމުންނެވެ.

އިޒްރޭލުގެ އަސްކަރީ ހަތިޔާރުގައި އެތައް ހާސް ހަތިޔާރެއް ހިމެނޭއިރު، އެ ހަތިޔާރުތަކަށް ބާރު ލިބިފައިވަނީ ބައިނަލްއަގްވާމީ ބޮޑެތި އެހީތަކުންނެވެ. އެމެރިކާއަކީ އެންމެ ބޮޑު އެއްބާރުލުމެއް ދޭ ގައުމެވެ. އަހަރަކު ބިލިއަން ޑޮލަރުގެ އަސްކަރީ އެހީތެރިކަން އެމެރިކާއިން އިސްރާއީލަށް ފޯރުކޮށްދެއެވެ. 

އިސްރާއީލަށް އެމެރިކާއާއި ހުޅަނގުގެ ޚާއްޞަކޮށް ނޭޓޯގެ ޤައުމުތަކުން ލިބޭ އެހީގެ ތެރޭގައި ޒަމާނީ ފަޔަރ ޖެޓްތަކާއި މިސައިލް ޑިފެންސް ސިސްޓަމްތަކާއި ޕްރެސިޝަން ހަތިޔާރުތަކާއި ފައިސާ ހިމެނޭ ކަމަށް ރިޕޯޓުތައް ބުނެއެވެ. ޖަރުމަނުން ސަބްމެރިންތަކާއި ކަނޑުގެ ސިފައިންގެ އެހެން އެސެޓްތައް ފޯރުކޮށްދޭއިރު، ފްރާންސާއި އިނގިރޭސިވިލާތް ފަދަ ޤައުމުތަކުން އިތުރު ސާމާނާއި ޖާސޫސީ އެހީތެރިކަން ފޯރުކޮށްދެ އެވެ. މި ޕާޓްނަޝިޕްތަކުގެ ސަބަބުން އިސްރާއީލުގެ ދިފާއީ ޤާބިލްކަން ވަނީ އިތުރުވެފައެވެ.