ދިވެހިރާއްޖެއަށް އެތެރެކުރަން އުޅުނު 5.9 ކިލޯގެ މަސްތުވާތަކެތި ކަސްޓަމްސްއިން އަތުލައިގަނެ، މި މައްސަލައާ ގުޅިގެން 45 އަހަރުގެ ދިވެހި ފިރިހެނަކު ހައްޔަރުކޮށްފިއެވެ.

ކަސްޓަމްސްއިން މިއަދު ހާމަކުރި ގޮތުގައި، މި މަސްތުވާތަކެތި އަތުލައިގަނެވިފައިވަނީ 31 އޮކްޓޫބަރުގައި ބެންކޮކުން ރާއްޖެ ގެނެސްފައިވާ އެއާފްރައިޓް ޝިޕްމަންޓެއް ބަލައި ފާސްކުރުމުގެ ތެރޭގައެވެ. އަތުލައިގަނެވުނު މަސްތުވާތަކެތީގެ ތެރޭގައި ހިމެނެނީ ކެނަބިސް އަދި ކެތިނޯންއެވެ.

ކަސްޓަމްސްގެ ބަޔާނުގައި ދެއްވި މަޢުލޫމާތުގައިވާ ގޮތުން، މި މަސްތުވާތަކެތީގެ މަގުމަތީ އަގު 3,348,000 ރުފިޔާއަށް އަރައެވެ. އަދި މި މައްސަލައާ ގުޅިގެން އަތުލައިގަނެވުނު މަސްތުވާތަކެއްޗާއި، މައްސަލައިގައި ޝާމިލްވާ 45 އަހަރުގެ ދިވެހި ފިރިހެނާ މިހާރު ވަނީ ދިވެހި ފުލުހުންގެ ޚިދުމަތާ ހަވާލުކޮށްފައެވެ.

 ފުލުހުންގެ ތަފާސްހިސާބުތަކުން ދައްކާ ގޮތުގައި، 2023 ވަނަ އަހަރުގެ ޖަނަވަރީ 1 އިން އޮގަސްޓު 31 އާ ހަމައަށް، ޖުމްލަ 282 މިލިއަން ރުފިޔާގެ މަސްތުވާތަކެއްޗާއި ބަނގުރާ އަތުލައިގަނެވިފައިވެއެވެ.

މީގެ އިތުރުން، މި މުއްދަތުގެ ތެރޭގައި މަސްތުވާތަކެއްޗާ ގުޅުންހުރި މައްސަލަތަކުގައި 8,554 މީހުން ބަލައި ފާސްކޮށްފައިވާއިރު، 712 މީހުން ވަނީ ހައްޔަރުކޮށްފައެވެ. ފުލުހުންގެ ޑްރަގް އެންފޯސްމަންޓުން ޖުމްލަ 113 އޮޕަރޭޝަން ހިންގާފައިވާއިރު، 80 ބިދޭސީން ވަނީ އިމިގްރޭޝަނާ ހަވާލުކޮށްފައެވެ.