ރައީސް މުޢިއްޒު ޕެޓް ކެއަރ ފެސިލިޓީ "އޮޅުހިޔާ" ހުޅުއްވައިދެއްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުމާލޭ ދެވަނަ ފިޔަވަހީގައި ޤާއިމުކުރި ޕެޓް ކެއަރ ފެސިލިޓީ "އޮޅުހިޔާ" މިއަދު ހުޅުއްވައިދެއްވައިފިއެވެ.

މި ފެސިލިޓީ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، މިއީ ވަރަށް މުހިންމު މަސައްކަތެއްގެ ފެށުން ކަމަށާއި، މި ފެސިލިޓީއާއެކު މަގުމަތީގައި ބުޅާ ގިނަވާ މައްސަލައަށް އެދެވޭ ޙައްލެއް ލިބިގެންދާނެކަމަށެވެ. އަދި ކުރިއަށް އޮތް މަސްތަކުގައި މާލޭގެ ރައްޔިތުންނަށް މިކަމުން ލިބިގެންދާނެ ހިތްހަމަޖެހުން އިހުސާސް ވެގެންދާނެކަމަށްވެސް ރައީސް ވިދާޅުވިއެވެ.

މާލެ ސަރަޙައްދުގެ މަގުތަކުގައި އުޅޭ ބުޅާތައް ގެންދިއުމަށް ޤާއިމްކުރާ މި ފެސިލިޓީގެ މަސައްކަތް ކޮށްފައިވަނީ ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ ބެލުމުގެ ދަށުންނެވެ. މި ފެސިލިޓީ ހެދުމަށް 5،000 އަކަ ފޫޓުގެ ބިމެއް ހުޅުމާލޭ ދެވަނަ ފިޔަވަހީގެ ކުރީގެ ފަރުކޮޅުފުށި އޮތް ސަރަހައްދުން ވަނީ ހަމަޖައްސާފައެވެ.

ރައީސް އިތުރަށް ވިދާޅުވީ، މި ފެސިލިޓީ ހުޅުވުމަކީ ސަރުކާރުގެ ފުރަތަމަ 100 ދުވަހުގެ ތެރޭގައި ކުރަން ރޭވި ކަންތައްތަކުގެ ތެރެއިން އެއް ކަންތައް ކަމަށެވެ. އަދި މި ފެސިލިޓީއިން ފޯރުކޮށްދެވޭ ޚިދުމަތްތައް ކުރިއަށް އޮތްތާނގައި އިތުރަށް ފުޅާކުރެވި ޕްރޮފެޝަނަލް ވެޓް ކެއަރ ލިބިގެންދާނެ ކަމަށާއި، މިފަދަ މައްސަލަތަކަށް ޙައްލު ހޯދުމުގައި ރައްޔިތުންނާ ގާތުން މަސައްކަތްކުރައްވާނެ ކަމަށްވެސް ރައީސް ވިދާޅުވިއެވެ.

ކުރިއަށް އޮތްތާނގައި މި ފެސިލިޓީގައި ކެޓް ކެފޭއަކާއި ވެޓް ކްލިނިކެއްގެ އިތުރުން ކެޓް ޝޮޕެއްވެސް ހުޅުވުމަށް ވަނީ ހަމަޖެހިފައެވެ.