ރާއްޖޭގެ ފުޓުބޯޅަ ދަށަށް ގޮސްފައިވާ ދަނޑިވަޅެއްގައި، މި ސަރުކާރުން ކުރަމުންދާ މަސައްކަތްތަކަށް އަލިއަޅުވާލައި، ރާއްޖޭގެ ފުޓުބޯޅަ އަލުން ކޮޅަށްޖެހުމަށް ފީފާއިން އިތުރު އެހީތެރިކަން ފޯރުކޮށްދޭން ނިންމައިފިއެވެ.

އެފްއޭއެމް ހިންގުމަށް ފީފާއިން އެކުލަވާލާފައިވާ ނޯމަލައިޒޭޝަން ކޮމިޓީން ބުނީ ފީފާގެ ރައީސް ޖިއާނީ އިންފަންޓީނޯ ވަނީ ރާއްޖޭގެ ފުޓްބޯޅަ އިތުރަށް ތަރައްޤީކުރުމަށް ޚާއްޞަ އެހީތެރިކަމެއް ދޭނެ ކަމުގެ ޔަޤީންކަން ދެއްވާފައެވެ. 

ފީފާއިން ޢާންމުކޮށް ދޭ ބަޖެޓުގެ އިތުރުން، އެފްއޭއެމްއަށް އިތުރު އެހީތެރިކަން ފޯރުކޮށްދޭން ނިންމާފައިވާކަން ނޯމަލައިޒޭޝަން ކޮމިޓީގެ ޗެއާޕާސަން އަޙްމަދު ޒުހޫރުވެސް ވަނީ ހާމަކުރައްވާފައެވެ. މީގެ ތެރޭގައި އެފްއޭއެމްގެ މުވައްޒަފުންގެ މުސާރަ ދިނުމަށް މަހުން މަހަށް ފައިސާގެ އެހީއެއް ދިނުން ހިމެނެއެވެ.

އަދި ރާއްޖޭގައި ޒުވާން ކުޅުންތެރިން ތަރައްޤީ ކުރުމަށް ފުޓްބޯޅަ އެކަޑަމީއެއް ޤާއިމުކުރުމަށް ފީފާއިން ފައިސާގެ އެހީތެރިކަން ފޯރުކޮށްދޭނެ ކަމަށް އިންފަންޓީނޯ ވިދާޅުވެފައިވެއެވެ. މި އެކަޑަމީގެ ތެރެއިން ޒުވާން ކުޅުންތެރިން ތަމްރީނުކުރުމާއި ފުޓްބޯޅައިގެ އިންފްރާސްޓްރަކްޗަރ ތަރައްޤީކުރުމަށް މަސައްކަތް ފަށާނެއެވެ.

ހުޅުމާލޭގައި ޤާއިމުކުރަން ނިންމާފައިވާ ފުޓްބޯޅަ އެކަޑަމީގެ މަޝްރޫޢު ކުރިއަށް ގެންދިއުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެހީތެރިކަމަށް އެދި އެފްއޭއެމްއިން ވަނީ ސަރުކާރަށްވެސް ސިޓީއެއް ފޮނުވާފައެވެ. މިހާރު އެ ބިން އަނބުރާ ހޯދުމަށް ސަރުކާރާއެކު މަޝްވަރާތައް ކުރަމުންދާ ކަމަށް ޒުހޫރު ވިދާޅުވިއެވެ.