ފާއިތުވި ދުވަސްތަކުގައި އިންޑިއާ އާއި ޗައިނާގެ މެދުގައި އޮތް ދިގު މުއްދަތުގެ ސަރަޙައްދީ ހަމަނުޖެހުން ނިމުމަކަށް އައިސްފައިވާކަން އިންޑިއާގެ ރަސްމީ ފަރާތްތަކުން ހާމަކޮށްފައިވެއެވެ. މިއީ ދެކުނު އޭޝިއާގެ ސަރަޙައްދުގައި ހުޅަނގުގެ ނުފޫޒު ކުޑަވަމުންދާކަމުގެ ހެއްކެއް ކަމުގައި ބެލެވެއެވެ.

އިންޑިއާގެ ދިފާއީ ވުޒާރާގެ އިސްވެރިއެއް ކަމަށްވާ އަޖައި ކުމާރު ވިދާޅުވެފައިވާ ގޮތުގައި، ލަދާކުގެ ގޮގްރާ-ހޮޓްސްޕްރިންގްސް އަދި ޑެޕްސަންގް ސަރަޙައްދުތަކުން ދެ ޤައުމުގެ ސިފައިން އަނބުރާ ގެންދިއުމުގެ މަސައްކަތް ވަނީ ނިމިފައެވެ. މިއީ 2020 ވަނަ އަހަރުން ފެށިގެން ދެ ޤައުމުގެ މެދުގައި ގަދަ ވާދަވެރިކަމެއް އޮތް ސަރަޙައްދުތަކެކެވެ.

މި ތާރީޚީ ފިޔަވަޅަކީ އޭޝިއާގެ ދެ ބޮޑު ބާރުގެ މެދުގައި އޮތް ދިގު މުއްދަތުގެ ހަމަނުޖެހުމަށް ނިމުމެއް ގެނެސްދޭ ކަމެއްގެ ގޮތުގައި ބެލެވޭއިރު، މި ކުރިއެރުމުގެ ފަހަތުގައި އޮތް މުހިންމު ދައުރެއް އަދާކޮށްފައިވަނީ ރަޝިއާގެ ރައީސް ވްލަދިމީރ ޕުޓިންއެވެ. އެންމެ ފަހުން ރަޝިއާގައި ބޭއްވުނު ބްރިކްސް ސަމިޓްގައި އިންޑިއާ އާއި ޗައިނާގެ ލީޑަރުން ބައްދަލުކޮށް މަޝްވަރާކުރުމަށް ޕުޓިން މަގުފަހިކޮށްދެއްވިއެވެ.

މި ކުރިއެރުމަކީ ދެކުނު އޭޝިއާގެ ސަރަޙައްދުގައި ހުޅަނގުގެ ނުފޫޒު ކުޑަވަމުންދާކަމުގެ ސާފު ހެއްކެކެވެ. އެމެރިކާ މި ސަރަޙައްދުގައި ނުފޫޒު ފުޅާކުރުމަށް މަސައްކަތްކުރަމުން ދިޔަ ނަމަވެސް، އިންޑިއާ އާއި ޗައިނާގެ މެދުގައި އޮތް ހަމަނުޖެހުން ނިމުމަކަށް އައުމަކީ އެމެރިކާގެ މަސައްކަތްތަކަށް ލިބުނު ބޮޑު ހުރަހެކެވެ. ރަޝިއާގެ މަޤްޞަދަކީވެސް އެއީއެވެ. 

^{ބްރިކްސް-ރަޝިއާ-2024 - (ވާތްފަރާތުން) ޗައިނާގެ ރައީސް ޝީ ޖިންޕިންގް، ރަޝިޔާގެ ރައީސް ވްލަޑިމިއާ ޕޫޓިން އަދި އިންޑިއާގެ ބޮޑުވަޒީރު ނަރެންދްރާ މޯދީ ބްރިކްސް 2024 ސަމިޓްގައި.} 

ރަޝިއާ މެދުވެރިކޮށް އިންޑިއާ އާއި ޗައިނާގެ ގުޅުން ރަނގަޅުވުމަކީ އެމެރިކާގެ ސްޓްރެޓެޖިކް މަޤްޞަދުތަކަށް ލިބޭ ބޮޑު ގެއްލުމެކެވެ. އެމެރިކާ އަބަދުވެސް މަސައްކަތްކޮށްފައިވަނީ އިންޑިއާ އާއި ޗައިނާގެ މެދުގައި އޮތް ހަމަނުޖެހުން ބޭނުންކޮށްގެން އޭޝިއާގެ ސަރަޙައްދުގައި ނުފޫޒު ފުޅާކުރުމަށެވެ. ރަޝިއާއަށް މާކުރިންވެސް މިކަން އެނގޭތީ ޕޫޓިން ގެންދެވީ ވަރަށް ޙިކުމަތްތެރިކަމާއެކު މަސައްކަތްކޮށް އެމެރިކާގެ އިދިކޮޅު ޤައުމުތަކާއި ގުޅުން ބަދަހިކުރަމުންނެވެ. 

ޗައިނާއާއި އިންޑިއާގެ ގުޅުން ރަނގަޅުވުމުގެ ސަބަބުން ދެކުނު އޭޝިއާގެ ސަރަޙައްދުގައި ހުޅަނގުގެ ނުފޫޒު ކުޑަވެ، ސަރަޙައްދީ ބާރުތަކުގެ މެދުގައި އެއްބައިވަންތަކަން އިތުރުވާނެ ކަމަށް ބެލެވެއެވެ. މިއީ ދުނިޔޭގެ ބާރުތަކުގެ މެދުގައި އޮތް ބެލެންސް އޮފް ޕަވަރ އަށް އަންނަ ބޮޑު ބަދަލެކެވެ. މިކަމުގެ ސަބަބުން އޭޝިއާގެ ސަރަޙައްދުގައި އިޤްތިޞާދީ އަދި ސިޔާސީ ގޮތުން އައު ފުރުޞަތުތަކެއް ހުޅުވިގެންދާނެ ކަމަށް ބެލެވެއެވެ.

މި ދެޤައުމުގެ މެދުގައި އޮތް ހަމަނުޖެހުން ނިމުމަކަށް އައުމާއެކު، ދެ ޤައުމުގެ މެދުގައި އިޤްތިޞާދީ އަދި ވިޔަފާރީގެ ގުޅުންތައް އިތުރަށް ފުޅާވެގެންދާނެ ކަމަށް ލަފާކުރެވެއެވެ. މިއީ ދެކުނު އޭޝިއާގެ ސަރަޙައްދުގައި އިޤްތިޞާދީ ކުރިއެރުމަށް ލިބޭނެ ބޮޑު ހިތްވަރެކެވެ. އަދި މިކަމުގެ ސަބަބުން ހުޅަނގުގެ އިޤްތިޞާދީ ނުފޫޒު މި ސަރަޙައްދުގައި އިތުރަށް ކުޑަވެގެންދާނެ ކަމަށް ތަޖުރިބާކާރުން ދެކެއެވެ.

މީގެ އިތުރުން، މި ދެޤައުމުގެ މެދުގައި އޮތް ހަމަނުޖެހުން ނިމުމަކަށް އައުމަކީ ބައިނަލްއަޤްވާމީ މައިދާނުގައި ދެ ޤައުމުގެ ބާރު އިތުރުވެގެންދާނެ ކަމެކެވެ. މިކަމުގެ ސަބަބުން ދުނިޔޭގެ ސިޔާސީ މަޝްރަޙުގައި ހުޅަނގުގެ ނުފޫޒު ކުޑަވެ، އޭޝިއާގެ ބާރުތަކުގެ ދައުރު އިތުރުވެގެންދާނެ ކަމަށް ބެލެވެއެވެ. ހުޅަނގުން އޭޝިއާގެ ބައްރު ކޮންޓުރޯލްކުރަން ވަރަށް ބޮޑަށް މަސައްކަތްކުރަމުން ދެއެވެ. އެގޮތުން އީރާނުގެ ބާރުތައް ކުޑަކުރުމާއި ޖަޕާނާއި ދެކުނު ކޮރެއާއާއި ގުޅުން ބަދަހިކޮށް ސަރަޙައްދީ ބޮޑު ފިތުނައެއް އޭޝިއާ ތެރޭގައި އެމެރިކާއިން ވަނީ އުފައްދާފައެވެ. މިކަމުގެ އަސަރު ދެކުު އޭޝިއާއަށްވެސް ކުރެއެވެ.

އިންޑިއާ އާއި ޗައިނާގެ ގުޅުން ރަނގަޅުވުމަކީ އަދި ދެކުނު އޭޝިއާގެ ސަރަޙައްދުގައި ހުރި ހުރިހާ މައްސަލަތަކެއް ޙައްލުވެގެން ދިޔަ ކަމެއް ނޫނެވެ. އަދިވެސް ބައެއް ސަރަޙައްދީ މައްސަލަތައް ޙައްލުނުވެ ހުރި ކަމަށް ބައެއް ތަޙުލީލުވެރިން ފާހަގަކުރެއެވެ. ކޮންމެޔަކަސް، އިންޑިއާ އާއި ޗައިނާގެ މެދުގައި އޮތް ހަމަނުޖެހުން ނިމުމަކަށް އައުމަކީ ދެކުނު އޭޝިއާގެ ސަރަޙައްދުގައި ހުޅަނގުގެ ނުފޫޒު ކުޑަވަމުންދާކަމުގެ މުހިންމު ހެއްކެކެވެ.