އިސްރާއީލުން ލުބުނާނަށް ދެމުންދާ އަނިޔާވެރި ޙަމަލާތަކުގެ ސަބަބުން އެތައް ހާސް މާބަނޑު އަންހެނުންނަށް ނޭދެވޭ އަސަރުކުރަމުންދާ ކަމަށް އދ. އިން ބުނެފިއެވެ.
އދ އިން ބުނާ ގޮތުގައި ލުބުނާނުގައި 11،600 މާބަނޑު އަންހެނުންނަށް މިހާރު ވަނީ އިސްރާއީލުގެ ޙަމަލާތަކުގެ އަސަރު ކޮށްފައެވެ. އޭގެ ތެރެއިން 1،300 އަންހެނުން ކުރިއަށް އޮތް މަހެއްހާ ދުވަހުގެ ތެރޭގައި ވިހާނެ ކަމަށް ލަފާކުރެވެއެވެ.
އިސްރާއީލުގެ ޙަމަލާތަކުގެ ސަބަބުން ލުބުނާނުގެ 1.4 މިލިއަނަށް ވުރެ ގިނަ މީހުން ގެދޮރު ގެއްލިފައިވާއިރު، އޭގެ ތެރޭގައި ބައި މިލިއަން ކުޑަކުދިން ހިމެނޭ ކަމަށް ލުބުނާނުގެ އޮފިޝަލުން ވަނީ ހާމަކޮށްފައެވެ. މިކަމުގެ ސަބަބުން ގިނަ އާއިލާތަކެއް ދަނީ ޖިސްމާނީ، މާލީ އަދި ނަފްސާނީ ގޮތުން ބޮޑެތި ދަތިތަކާއި ކުރިމަތިލަމުންނެވެ.
Advertisement
އިސްރާއީލުގެ ޙަމަލާތަކުގައި ލުބުނާނުގެ އިންފްރާސްޓްރަކްޗަރގެ ތިންބައިކުޅަ އެއްބައި ހަލާކުވެ ޞިއްޙީ ޚިދުމަތްތަކަށް ވަނީ ހީނަރުވެފައެވެ. މަދުވެގެން 100 ޕްރައިމަރީ ހެލްތު ކެއަރ ސެންޓަރާއި ފަސް ހޮސްޕިޓަލް ބަންދުކުރަން މަޖުބޫރުވެފައިވާ ކަމަށް ރިޕޯޓުތަކުގައި ވެއެވެ.
ލުބުނާނަށް އިސްރާއީލުން ދެމުންދާ ޙަމަލާތަކުގައި 166 ކުޑަކުދިން މަރުވެފައިވާ ކަމަށް ލުބުނާނުގެ އޮފިޝަލުން ބުނެއެވެ. މީގެ އިތުރުން، ޔުނިސެފުން ބުނާ ގޮތުގައި ކޮންމެ ދުވަހަކު އިތުރު 10 ކުދިން ޒަޚަމް ވެއެވެ.
"ގިނަ ދުވަސްތަކެއް ވަންދެން މެދުނުކެނޑި ބޮން އެޅުމުގެ ސަބަބުން ޖިސްމާނީ ގޮތުން ގެއްލުމެއް ނުލިބި ސަލާމަތްވި ނަމަވެސް އެތައް ހާސް ކުދިން މިހާރު ތިބީ ނަފްސާނީ ގޮތުން ބިރުވެރިކަމެއްގެ ތެރޭގައި،" ޔުނިސެފްގެ އެގްޒެކެޓިވް ޑިރެކްޓަރު ކެތަރިން ރަސެލް ވަނީ ބުނެފައެވެ. އަދި މިހާރުން މިހާރަށް، ނާޒުކު ޙާލަތުގައި ތިބި މާބަނޑު އަންހެނުންނާއި ކުޑަކުދިންނަށް އެހީތެރިކަން ބޭނުންވެފައިވާ ކަމަށް އދ. އިން ވަނީ އިލްތިމާސްކޮށްފައެވެ.
