މާލޭގައި ހިނގި އޮޅުވާލައިގެން ފޭރުމުގެ މައްސަލައަކާ ގުޅިގެން މާލޭގެ އަންހެނަކު ފުލުހުން ހައްޔަރުކޮށްފިއެވެ. މި މައްސަލައިގައި ހައްޔަރުކުރެވުނީ މއ. ފޯޗިއުންގެ ފާތިމަތު އަލީ (37 އަހަރު) ކަމަށް ފުލުހުން ބުނެއެވެ.
ފުލުހުން މައުލޫމާތު ދިންގޮތުގައި މި މައްސަލަ ހިނގާފައިވަނީ ރޭ 10:00 ހާއިރު މާލޭގެ ގަލޮޅު ސަރަހައްދުގައި ހުންނަ ގެއެއްގައެވެ. މި ހާދިސާގައި އެ އަންހެންމީހާ ވަނީ ބަންގްލަދޭޝްގެ މީހަކަށް އޮޅުވާލައިގެން ގެއަކަށް ގެންގޮސް ވަޅިން ބިރުދައްކައި ފޭރިފައިވާކަމަށް ފުލުހުން ބުނެއެވެ. ނަމަވެސް ފޭރުނު ފައިސާގެ އަދަދު އަދި ހާމަކޮށްފައެއް ނުވެއެވެ.
މި މައްސަލައާ ގުޅިގެން އޭނާ ހައްޔަރުކޮށްފައިވާއިރު، ފުލުހުން މިހާރު ދަނީ މި ހާދިސާގައި އޭނާއަށް އެހީތެރިވެދިން ކަމަށް ތުހުމަތުކުރެވޭ ދިވެހި ފިރިހެނަކު ހޯދުމުގެ މަސައްކަތް ކުރަމުންނެވެ.
Advertisement
ފުލުހުން ފާހަގަކުރިގޮތުގައި މިފަދަ މައްސަލަތައް މާލެ ސަރަހައްދުގައި އިތުރުވަމުން އަންނަނީ ގްރޫޕް ހަދައިގެން ހިންގާ ޖަރީމާތަކެއްގެ ގޮތުގައެވެ. މިގޮތުން މިދިޔަ ސެޕްޓެމްބަރު މަހު، މާލޭގެ ގެއަކަށް މީހަކު ވައްދައި ބަރަހަނާކޮށް، ބިރުދައްކައިގެން ކޭޝް ކާޑުގެ ޕިން ނަންބަރު ހޯދައި އެކައުންޓުން ފައިސާ ފޭރުނު މައްސަލައެއްގައި ވެސް ތިން މީހެއްގެ މައްޗަށް ވަނީ ދަޢުވާ އުފުލާފައެވެ.
"ގުރޫޕް ހަދައިގެން ފޭރެނީ ހަކުރުބޯން ވެގެން. އަންހެން މީހާ ބޭނުންކޮށްގެން ފައިސާ މިހޯދަނީ ބޮންދުންގެ އަތުން.. ތިގޮތަށް މުޅިން ވެސް ހައްޔަރުކޮށްފައިވަނީ މަސްތުވާ އެއްޗެހި ބޭނުންކުރާ މީހުން. މާލޭގައި މަސްތުވާތަކެތި އެހާ ގިނައެހާ ބާރުވެސް ގަދަ. ނުލާހިކު ބާރުގަދަ އެއްޗެހި އެއީ. އެހެންވެ އެއަށް "ސިކުވެގެން" ފައިސާ ހޯދަން އެބަޖެހޭ ކޮންމެ ގޮތެއް ހަދައިގެންވެސް. މިއީ އަސްލު މިވާގޮތަކީ" މަސްތިވާތަކެއްޗަށް ދެވިހިފާފައިވާ މީހަކު ބުންޏެވެ.
