2025 ވަނަ އަހަރަށް ހުށަހަޅާފައިވާ ދައުލަތުގެ ބަޖެޓުގައި ތަންފީޒުކުރަން ނިންމާފައިވާ މާލީ އިސްލާހުތަކާއެކު ދައުލަތުގެ ޚަރަދުން 6.6 ބިލިއަން ރުފިޔާ ސަލާމަތްކުރެވޭނެ ކަމަށް ފިނޭންސް 0ޒަމީރު ވިދާޅުވެއްޖެއެވެ.

ރައްޔިތުންގެ މަޖިލީހަށް 56.6 ބިލިއަން ރުފިޔާގެ ރެކޯޑު ބަޖެޓެއް ހުށަހަޅުއްވަމުން މިނިސްޓަރު ޒަމީރު ވިދާޅުވީ، ޚަރަދު ކުޑަކުރުމަށް ގިނަ ފިޔަވަޅުތަކެއް އަޅަން ނިންމާފައިވާ ކަމަށެވެ.

މި ފިޔަވަޅުތަކުގެ ތެރޭގައި ސަބްސިޑީގެ އެހީ ބޭނުންވާ ފަރާތްތަކަށް ސީދާ ގޮތެއްގައި ސަބްސިޑީ ފޯރުކޮށްދޭ ނިޒާމަކަށް ބަދަލުކުރުމާއި، އާސަންދަ ނިޒާމު މުރާޖަޢާކޮށް މިހާރަށްވުރެ ވަށާޖެހޭ ފުރިހަމަ އަދި ދެމެހެއްޓެނިވި ނިޒާމަކަށް ބަދަލުކުރުން ހިމެނެއެވެ. އަދި ތެލުގެ އަގަށް އަންނަ ބަދަލުތަކުން ކުރިމަތިވާ ފިސްކަލް އަދި އެކްސްޓަރނަލް ސެކްޓަރގެ ހިރާސްތައް ހެޖްކުރުމާއި، ދައުލަތުން ފޯރުކޮށްދޭ ޕެންޝަންތައް މުރާޖަޢާކުރުމާއި، އެސްއޯއީތައް ރިފޯމްކުރުން ވެސް ހިމެނެއެވެ.

"ރައީސް ޑރ. މުހައްމަދު މުއިއްޒުގެ ތަސައްވުރު ހާސިލުކުރުމަށް އޮތް އެންމެ ބޮޑު ގޮންޖެހުމަކީ ހީނަރުވެފައިވާ ފިސްކަލް ހާލަތް. އަހަރުތަކެއް ވަންދެން ޚަރަދު ކުޑަކުރުން ފަސްކޮށް، ބޮޑެތި އަދަދުތަކުން ޑެފިސިޓް ބަޖެޓުތައް ތަންފީޒުކުރަމުން ގޮސްފައިވުމުގެ ނަތީޖާއަކީ، ދައުލަތުގެ ދަރަނި އިތުރުވެ، މިހާރު އެކީ އެއްފަހަރާ ގިނަ ނިޒާމީ ބަދަލުތަކެއް ގެންނަން މަޖުބޫރުވުން،" މިނިސްޓަރު ޒަމީރު ވިދާޅުވިއެވެ.

ޚަރަދު ކުޑަކުރުމުގެ އިތުރުން، އާމްދަނީ އިތުރުކުރުމަށް ވެސް ފިޔަވަޅުތަކެއް އަޅަން ނިންމާފައިވާ ކަމަށް މިނިސްޓަރު ވިދާޅުވިއެވެ. މިގޮތުން ފަތުރުވެރިކަމުގެ ދާއިރާއާ ގުޅުންހުރި ބައެއް ޓެކުހާއި ފީގެ ރޭޓުތައް މަތިކުރުމާއި، ޖީއެސްޓީ ނެގޭ ދާއިރާ ފުޅާކުރުން ހިމެނެއެވެ.

އޭގެތެރޭގައި ޑިޕާޗަރ ޓެކުހާއި އެއަރޕޯޓު ޑިވެލޮޕްމަންޓް ފީ އަދި ޓީޖީއެސްޓީގެ ރޭޓުތައް މަތިކުރަން ވަނީ ނިންމާފައެވެ. މި ބަދަލުތައް ފަރުމާކޮށްފައިވަނީ އާންމު ދިވެހި ރައްޔިތުންނަށް ބުރަ ބޮޑުނުވާނޭ ގޮތަށް ކަމަށް ވަޒީރު ވިދާޅުވިއެވެ.

އަންނަ އަހަރުގެ މެދުތެރޭގައި "ޑެސްޓިނޭޝަން ޕްރިންސިޕަލް" ފުރިހަމައަށް ތަންފީޒުކުރަން ފެށޭނެ ކަމަށް ވެސް މިނިސްޓަރު ވިދާޅުވިއެވެ. މިއާއެކު އޮފްޝޯ ޓްރެވެލް އޭޖެންޓުންނާއި ބުކިންގ ޕްލެޓްފޯމްތަކުން ފޯރުކޮށްދޭ ފަތުރުވެރިކަމުގެ ޚިދުމަތްތަކުން ޓީޖީއެސްޓީ ނެގޭނެ އިންތިޒާމު ހަމަޖެހޭނެ ކަމަށް ވެސް އޭނާ ވިދާޅުވިއެވެ.