ސަރުކާރުން 2025 ވަނަ އަހަރަށް ހުށަހަޅާފައިވާ 56.6 ބިލިއަން ރުފިޔާގެ ބަޖެޓުގައި ސިއްހީ ދާއިރާއަށް ޚާއްސަ އިސްކަމެއްދީ ރާއްޖޭގެ އެކި ކަންކޮޅުތަކުގައި ޚާއްޞަ 5 ހޮސްޕިޓަލް އަޅާނެ ކަމަށް އިޢުލާން ކޮށްފިއެވެ.
މިއަދު މާލީ ވަޒީރު މޫސާ ޒަމީރު ރައްޔިތުންގެ މަޖިލީހަށް ހުށަހެޅުއްވި ބަޖެޓުގައި، ސިއްހީ ދާއިރާއަކީ އަވަސް ކުރިއެރުމެއް ބޭނުންވާ ވަރަށް މުހިންމު ދާއިރާއެއްގެ ގޮތުގައި ފާހަގަކުރައްވަމުން ވިދާޅުވީ ދިވެހިރާއްޖޭގައި ޚާއްސަ ފަރުވާއަށް އޮތް ޑިމާންޑް އިތުރުވަމުންދާތީ، ސަރުކާރުން ވަނީ ކެންސަރަށް ޚާއްސަ ހޮސްޕިޓަލަކާއި ނަފްސާނީ ސިއްހަތުގެ ފެސިލިޓީއެއް ޤާއިމުކުރުމަށް ފައިސާ ކަނޑައަޅާފައެވެ. މީގެ އިތުރުން، މުޅި ދިވެހިރާއްޖޭގައި ހަމަހަމަ ގޮތެއްގައި ސިއްހީ ޚިދުމަތް ލިބޭނެ ގޮތް ހެދުމުގެ ގޮތުން ރަށު ސިއްހީ މަރުކަޒުތަކާއި ސަރަހައްދީ ހޮސްޕިޓަލްތައް ފުޅާކުރުމުގެ ޕްލޭންތައް ވެސް ބަޖެޓުގައި ހިމަނާފައިވެއެވެ.
ސިއްހީ ދާއިރާގެ ތަރައްޤީއަށް ކަނޑައަޅާފައިވާ ބަޖެޓުގެ ތެރެއިން، ޚާއްސަ 5 ހޮސްޕިޓަލް ޤާއިމްކުރުމަށް ނިންމާފައިވާއިރު، މި ހޮސްޕިޓަލްތަކުގެ ސަބަބުން ކެންސަރު ބަލީގެ ފަރުވާއާއި ބޯންމެރޯ ޓްރާންސްޕްލާންޓް ކުރުމާއި އޯގަން ޓްރާންސްޕްލާންޓް ފަދަ ޚާއްސަ ސިއްހީ ޚިދުމަތް ރާއްޖެއިން ލިބޭނެ މަގު ފަހިވެގެންދާނެއެވެ.
މިއީ ރާއްޖެއިން ބޭރުން ފަރުވާ ހޯދުމަށް ދަތުރުކޮށް އެކަމަށް ބަރޯސާވުން ކުޑަކޮށްދޭ ހަރުދަނާ ސިއްހީ ފަރުވާގެ އިންފްރާސްޓްރަކްޗަރއެއް ތަރައްޤީ ކުރުމަށް ރައީސް ވައުދުވެވަޑައިގެންފައިވާ ގޮތާ އެއްގޮތް ކަމެކެވެ. މިކަމަކީ ސިއްހީ ޚިދުމަތުގައި މިހާރު ހުރި ފަރަގުތައް ހައްލުކޮށް، މެޑިކަލް ދާއިރާގައި ދިވެހި ޒުވާން ޕްރޮފެޝަނަލުންނަށް އިތުރު ފުރުސަތުތަކެއް ލިބި، އަމިއްލައަށް ބަރޯސާވާ ސިއްހީ ނިޒާމެއް ބިނާކުރެވޭނެ ކަމެއް ކަމަށް ވެސް މާލީ ވަޒީރު ފާހަގަ ކުރެއްވިއެވެ.
2025 ވަނަ އަހަރަށް ސަރުކާރުން ހުށަހެޅި ބަޖެޓުގައި ވަނީ 56,647,600,859 (ފަންސާސް ހަ ބިލިޔަން، ހަސަތޭކަ ސާޅީސް ހަތް މިލިޔަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ.
