އޭޝިއަން ފުޓްބޯލް ފެޑެރޭޝަން (އޭއެފްސީ) އިން ހޮވާ އަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔާ ޤަތަރުގެ އަކްރަމް އަފީފް
އޭޝިއަން ފުޓްބޯލް ފެޑެރޭޝަން (އޭއެފްސީ) އިން ހޮވާ އަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔާގެ މަޤާމު ޤަތަރުގެ އަކްރަމް އަފީފް ހޯދައިފިއެވެ.
ދެކުނު ކޮރެއާގެ ވެރިރަށް ސޯލްގައި ބޭއްވި ޚާއްސަ ރަސްމިއްޔާތެއްގައި 27 އަހަރުގެ އަފީފަށް މި މަޤާމު ލިބުނުއިރު އަންހެން ކުޅުންތެރިންގެ ތެރެއިން އެންމެ މޮޅު ކުޅުންތެރިޔާގެ މަޤާމު ލިބުނީ ޖަޕާނުގެ ކީކޯ ސެއިކޭއަށެވެ.
ޤަތަރުގެ އަލް ސައްދު ފުޓްބޯޅަ ކްލަބަށް ކުޅެމުންދާ އަފީފަށް މި މަޤާމު ލިބުނީ ދެވަނަ ފަހަރަށެވެ. އޭނާ ވަނީ 2019 ވަނަ އަހަރުވެސް އޭޝިއާގެ އެންމެ މޮޅު ފުޓްބޯޅަ ކުޅުންތެރިޔާގެ މަޤާމު ހޯދާފައެވެ.
މި އަހަރުގެ ކުރީކޮޅު ޤަތަރުގައި ބޭއްވި އޭޝިއަން ކަޕް، އެ ޤައުމަށް ކާމިޔާބުކޮށްދިނުމުގައި އަފީފު ވަނީ މުހިންމު ދައުރެއް އަދާކޮށްފައެވެ. އޭޝިއަން ކަޕްގެ ފައިނަލުގައި އަފީފު ހެޓްރިކް ހެދިއެވެ. މިއީ މި މުބާރާތުގެ ތާރީޚުގައި ފައިނަލުގައި ހެޓްރިކް ހެދި ފުރަތަމަ ކުޅުންތެރިޔާއެވެ. މުޅި މުބާރާތުގައި އަފީފު ވަނީ އަށް ލަނޑު ޖަހައި، އެންމެ ގިނަ ލަނޑު ޖެހި ކުޅުންތެރިޔާގެ މަޤާމުވެސް ހޯދާފައެވެ.
އަފީފަށް ދެވަނަ ފަހަރަށް މި މަޤާމު ލިބުމާއެކު، އޭނާ ވެފައިވަނީ އޭޝިއާގެ މޮޅު ކުޅުންތެރިޔާގެ މަޤާމު ދެވަނަ ފަހަރަށް ހޯދި ތިންވަނަ ކުޅުންތެރިޔާއަށެވެ. މީގެ ކުރިން މި ޝަރަފު ދެ ފަހަރު މަތިން ހޯދާފައިވަނީ ޖަޕާނުގެ ހިޑެތޯޝީ ނަކާޓާ އާއި އުޒްބެކިސްތާނުގެ ސަރްވަރް ޖެޕަރޯވްއެވެ.
