ދިވެހިންގެ ގެތަކުގައި ސޯލާ ޕެނަލް ހަރުކޮށްގެން ކަރަންޓު އުފެއްދުމަށް ސަރުކާރުން ފަށާ "މަގޭ ސޯލާ" ޕްރޮގްރާމްގެ އަމަލީ މަސައްކަތް ނޮވެމްބަރު މަހު ފެށޭނެކަމަށް އެންވަޔަރަމަންޓް މިނިސްޓަރު ތޯރިގް އިބްރާހިމް ވަގުތު ނޫހަށް ދެއްވި އިންޓަވިއު އެއްގައި ވިދާޅުވެއްޖެއެވެ.
ޥަޒީރު ތޯރިގް ވިދާޅުވީ މި ޕްރޮގްރާމްގެ ދަށުން ފުރަތަމަ ރާއްޖެއަށް އަންނާނީ 700 ޔުނިޓް ކަމަށެވެ. އޭގެ ތެރެއިން 350 ޔުނިޓަކީ ތިން ކިލޯވޮޓްގެ ޔުނިޓް ކަމަށާއި ބާކީ 350 ޔުނިޓަކީ ފަސް ކިލޯވޮޓްގެ ޔުނިޓްތަކެވެ. މި ޕްރޮޖެކްޓްގެ އަގު 2.1 މިލިއަން ޑޮލަރަށް އަރާ ކަމަށް ވެސް ވަޒީރު ވިދާޅުވިއެވެ.
"މަގޭ ސޯލާ" ޕްރޮގްރާމަކީ އާންމުން ކަރަންޓަށް ކުރާ ހޭދަ ކުޑަކުރުމަށާއި ރާއްޖޭގައި ލިބެން ހުރި ހަކަތައިގެ ވަސީލަތްތަކުގެ ބޭނުންކުރުން އިތުރުކުރުމަށާއި ރާއްޖޭގައި ބޭނުންކުރާ ހަކަތައިގެ 33 ޕަސެންޓް އިޔާދަކުރަނިވި ހަކަތައަށް ހެދުމަށް ސަރުކާރުން ކަނޑައަޅާފައިވާ އަމާޒަށް ވާސިލްވުމަށް ހިންގާ ޕްރޮގްރާމެކެވެ.
Advertisement
މި ޕްރޮގްރާމްގެ ދަށުން ސޯލާ ޕެނަލް ޖަހާއިރު، އެއް ފަހަރާ ފައިސާ ދައްކާކަށް ނުޖެހޭނެ ކަމަށް ވަޒީރު ތޯރިގް ވިދާޅުވިއެވެ. އިންސްޓޮލޭޝަނަށް ފައިސާ ދެއްކުމަށް ފަހު، އަހަރުތަކަކަށް ބަހާލައިގެން ފައިސާ ދެއްކުމުގެ ފުރުސަތު އޮންނާނެ ކަމަށް ވެސް ވަޒީރު ވިދާޅުވިއެވެ.
ފެނަކަ އިން ކަރަންޓު ފޯރުކޮށްދޭ ރަށްތަކަށް މި ޕްރޮގްރާމް އަމާޒު ކުރިޔަސް، ކުރިއަށް އޮތް ތަނުގައި ސްޓެލްކޯ އިން ކަރަންޓު ފޯރުކޮށްދޭ ރަށްތަކަށް ވެސް މި ޕްރޮގްރާމް ތައާރަފް ކުރާނެއެވެ.
