ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، މެރކް ފައުންޑޭޝަން އެފްރިކާ އޭޝިއާ ލޫމިނަރީގެ 11 ވަނަ އަހަރީ ކޮންފަރެންސްގެ ޝަރަފުވެެރި މެހުމާނެއްގެ ގޮތުގައި ބައިވެރިވެވަޑައިގަތުމަށް ޓެންޒެނިޔާގެ ދާރުއްސަލާމަށް ވަޑައިގެންފިއެވެ.

ދާރުއްސަލާމްގެ ޖޫލިޔަސް ނިޔެރޭރޭ ބައިނަލްއަޤުވާމީ ވައިގެބަނދަރަށް ޤައުމުގެ ފަސްޓް ލޭޑީ ވަޑައިގަތުމުން، އެކަމަނާއަށް މަރުޙަބާ ދެންނެވީ ޓެންޒޭނިޔާގެ މިނިސްޓަރ އޮފް ކޮމިއުނިޓީ ޑިވެލޮޕްމަންޓް، ޖެންޑަރ، ވިމެން އެންޑް ސްޕެޝަލް ގްރޫޕްސް، އޮނަރަބަލް ރިޒީކީ ޖޫމާއެވެ.

މި ދަތުރުފުޅުގައި މެޑަމް ސާޖިދާ ބައިވެރިވެވަޑައިގަންނަވާ މުހިންމު ހަރަކާތްތަކުގެ ތެރޭގައި ފަސްޓް ލޭޑީސްގެ މަތީފަންތީގެ ޕެނަލްގައި ކީނޯޓް ތަޤުރީރެއް ދެއްވުމާއި، މެރކް ފައުންޑޭޝަން ފަސްޓް ލޭޑީސް އިނީޝިއެޓިވް ކޮމިޓީ ބައްދަލުވުމުގައި ވާހަކަފުޅު ދެއްކެވުން ހިމެނެއެވެ.

މެރކް ފައުންޑޭޝަން އެފްރިކާ އޭޝިއާ ލޫމިނަރީ އަކީ އަހަރަކު އެއްފަހަރު ބޭއްވޭ މުހިންމު ކޮންފަރެންސެކެވެ. މި ކޮންފަރެންސްގައި ސިއްޙީ ދާއިރާގެ ފަންނީ ތަޖުރިބާކާރުންނާއި، ސިޔާސަތު ކަނޑައަޅާ ފަރާތްތަކާއި، ދާރިސުން އެއްތަނަކަށް އެއްވެ، އަންހެނުން ބާރުވެރިކުރުވުމާއި، ބަލިތައް މެނޭޖުކުރުމާއި، އެފްރިކާ އާއި އޭޝިޔާގައި ފެންވަރު ރަނގަޅު ޞިއްޙީ ޚިދުމަތްތައް އަތްފޯރާފަށަށް ގެނައުމުގެ މަސައްކަތް ފުޅާކުރުން ފަދަ މުހިންމު މައުޟޫޢުތަކަށް މަޝްވަރާކުރެއެވެ.

މި ދަތުރުފުޅުގައި މެޑަމް ސާޖިދާ ބައިވެރިވެވަޑައިގަންނަވާ ހަރަކާތްތަކުން، އަންހެނުންގެ ޙައްޤުތަކާއި ޞިއްޙަތާ ގުޅޭ މުހިންމު މައުޟޫޢުތަކަށް އަލިއަޅުވާލެވި، ސަރަޙައްދީ އަދި ބައިނަލްއަޤުވާމީ ފެންވަރުގައި ރާއްޖެ ތަމްސީލުކުރެވިގެންދާނެ ކަމަށް ފާހަގަކުރެވެެއެވެ.