މާލޭގައި ބިދޭސީއަކު ބަރަހަނާކުރުމަށްފަހު، ކަރުގައި ވަޅި ޖައްސައިގެން ފައިސާތަކެއް ފޭރުނު ކަމަށް ބުނާ މައްސަލައެއްގައި ފިރިހެނަކު ހައްޔަރުކޮށްފިއެވެ.

މި މައްސަލާގައި ހައްޔަރުކުރީ އައްޑޫ ސިޓީ ހިތަދޫއަށް ނިސްބަތްވާ 35 އަހަރުގެ ފިރިހެނެއް ކަމަށް ފުހުން ބުންޏެވެ. މި މަހުގެ 23 ވަނަ ދުވަހު ކްރިމިނަލް ކޯޓުން ވަނީ އޭނާގެ ބަންދަށް 15 ދުވަސް ޖަހާފައެވެ.

ވައްކަމާއި ފޭރުމުގެ ރެކޯޑްތަކެއް އޮތް މި މީހާ އާއި އިތުރު މީހަކު އެކަމުގައި ޝާމިލް ވެއެވެ.

ފުލުހުންނަށް ބުނިގޮތުގައި، ދެމީހަކު ވެގެން ބިދޭސީ މީހާ ގެއަކަށް ވައްދައި، އަތާއި ފައި ބަނދެ، އޭނާ ބަރަހަނާކޮށް ކަރުގައި ވަޅި ޖެއްސުމަށްފަހު ފޭރިގެންފައިވެއެވެ. ފޭރިގަތް މީހުން ގެންގޮސްފައިވަނީ ބިދޭސީ މީހާގެ ޖީބުގައި އޮތް ވޮލެޓް ކަމަށާއި، އޭގައި 10،600 ރުފިޔާގެ ނަގުދު ފައިސާއާއި، ކާޑުތަކާއި އެހެނިހެން ލިޔެކިޔުންތައް ހުރި ކަމަށް ބިދޭސީ މީހާ ފުލުހުންނަށް މަޢުލޫމާތު ދީފައިވެއެވެ.

ފޭރުމުގެ ތެރޭގައި ބިދޭސީ މީހާއަށް އަނިޔާތަކެއް ވެސް ލިބިފައިވާ ކަމަށް ބަންދު އަމުރުގައި ބަޔާންކޮށްފައިވެއެވެ. އޭނާގެ ދެފަރާތު ކޮނޑުހުޅު ދުޅަވެ، ރަތްވެފައިވާ ކަމަށާއި އަދި ކަރުގައި އަނިޔާގެ ނިޝާންތައް ހުރިކަން ފުލުހުން ފާހަގަކުރިއެވެ.

ފުލުހުން ބުނީ، ތުހުމަތުކުރެވޭ މީހާ ހައްޔަރުކޮށްފައިވަނީ ފިލައިގެން އުޅެނިކޮށް މާލެ ޕެޓްރޯލް ކުރަމުން ދިޔަ ފުލުހުންނެވެ. ފިހާރައެއް ކައިރީގައި އޭނާ މަޑުކޮށްގެން ހުއްޓާ ފުލުހުން ގޮސް ބަލައިފާސްކުރުމުން، އޭނާގެ ޖީބުން ފެނުނީ 820 ރުފިޔާ ކަމަށާއި އެ ފައިސާއަކީ އޭނާގެ އަމިއްލަ ފައިސާ ކަމަށް އޭނާ ބުނެފައިވާއިރު، އެ ފައިސާ ވަނީ ފުލުހުންގެ ބެލުމުގެ ދަށަށް ގެންގޮސްފައި ކަމަށް ވެސް ފުލުހުން ބުންޏެވެ.