ބައިނަލްއަޤުވާމީ ގޮތުން ފާހަގަކޮށްލެވޭ އަމިއްލަ ވިޔަފާރިތަކާ ގުޅިގެން ކުދި ޤައުމުތަކަށް އިންވެސްޓްމެންޓް ގެނެވޭނެ މަގު ފަހިވާންޖެހޭކަމަށް ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.
ވަޒީރު މިހެން ވިދާޅުވީ ސަމޯއާގައި މިހާރު ކުރިއަށްދާ ކޮމަންވެލްތުގެ އިސްވެރިންގެ ބައްދަލުވުންތަކުގެ ތެރެއިން ބޭއްވި ހަރަކާތެއްގައި ވާހަކަފުޅު ދައްކަވަމުންނެވެ. މި ބައްދަލުވުމުގައި ދިވެހި ވަފްދުގެ އެންމެ އިސްވެރިޔެއްގެ ގޮތުގައި ބައިވެރިވެވަޑައިގަންނަވަނީ ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފެވެ.
ޚާރިޖީ ވަޒީރު ވިދާޅުވީ ދުނިޔޭގެ ތަރައްޤީގެ ލަނޑުދަނޑިތައް ޙާސިލްކުރުމަށް ބައިނަލްއަޤުވާމީ މައިދާނުގައި ކުދި ޤައުމުތަކުގެ ޚިޔާލާއި މަޝްވަރާ މުހިންމުކަމަށެވެ. އަދި ކުދި ޤައުމުތަކުގެ ޝާމިލުވުން އިތުރުކުރަންޖެހޭކަމަށްވެސް ވަޒީރު ފާހަގަކުރެއްވިއެވެ.
Advertisement
"ކުދި ޤައުމުތައް ކުރިއަރާ ދިޔުމުގައި، އެ ޤައުމުތަކަށް ފަސޭހައިން މާލީ އެހީތެރިކަން ލިބުން މުހިންމު. ބައިނަލްއަޤުވާމީ ގޮތުން ފާހަގަކޮށްލެވޭ އަމިއްލަ ވިޔަފާރިތަކާ ގުޅިގެން ކުދި ޤައުމުތަކަށް އިންވެސްޓްމެންޓް ގެނެވޭނެ މަގު ފަހިވާންޖެހޭ،" ވަޒީރު ވިދާޅުވިއެވެ.
ވަޒީރުގެ ވާހަކަފުޅުގައި ރާއްޖެއިންވެސް އާޓިފިޝަލް އިންޓެލެޖެންސްއާއި ފަންނިއްޔާތުގެ ދާއިރާ ފަދަ އައު ދާއިރާތަކަށް އިންވެސްޓްކުރަމުންދާކަން ފާހަގަކުރެއްވިއެވެ.
މި ބައްދަލުވުމުގައި ކުދި ޤައުމުތަކުގެ ތަރައްޤީއަށް ބޭނުންވާ އިންވެސްޓްމެންޓްތައް ގެނައުމަށް ބައިނަލްއަޤުވާމީ އަމިއްލަ ވިޔަފާރިތަކުގެ ދައުރު މުހިންމުކަން ފާހަގަކުރެވުނެވެ.
