ކޮމަންވެލްތްގެ ގާނޫނު ހަދާ މަޖިލިސްތަކުގެ ރައީސުންނާއި އޮފިސަރުންގެ 28 ވަނަ ކޮންފަރެންސްގައި ބައިވެރިވެވަޑައިގަތުމަށް، ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ މިއަދު ފުރާވަޑައިގަންނަވައިފި އެވެ.

ކޮމަންވެލްތް ކޮންފަރެންސްގައި ބައިވެރިވެވަޑައިގަތުމަށް މަޖިލީހުގެ ރައީސް އަބްދުއްރަހީމް ކުރައްވާ މި ދަތުރުފުޅަކީ ފަސް ދުވަހަށް ކުރައްވާ ކުރު ދަތުރުފުޅެކެވެ. މި ދަތުރުފުޅުގައި އަބްދުއްރަހީމްގެ އަރިހުގައި، ހުޅުދޫ ދާއިރާގެ މެމްބަރު މުހައްމަދު ޝާހިދާއި، މަޖިލީހުގެ އިދާރާގެ ޗީފް އޮފް ބިއުރޯ، އަހްމަދު ނިހާން ހުސައިން މަނިކު އަދި ސީނިއާ ފޮރިން ރިލޭޝަންސް އޮފިސަރު، އާއިޝަތު އީމާން ބައިވެރިވެވަޑައިގަތުމަށް ވަނީ ހަމަޖެހިފަ އެވެ.

ކޮމަންވެލްތްގެ ގާނޫނު ހަދާ މަޖިލިސްތަކުގެ ރައީސުންނާއި އޮފިސަރުންގެ 28 ވަނަ ކޮންފަރެންސް މި އަހަރު ބޭއްވުމަށް ހަމަޖެހިފައިވަނީ އިންޑިއާގެ ނިއު ދިއްލީގަ އެވެ.

މި ދަތުރުފުޅު ނިންމަވައި އަބްދުއްރަހީމް މާލެ ވަޑައިގަތުމަށް ހަމަޖެހިފައިވަނީ މި މަހުގެ 18 ވަނަ ދުވަހު އެވެ.