މަރުގެ ޙުކުމް ތަންފީޛު ކުރުމަށް ސަރުކާރުން ތައްޔާރުވަމުންދާ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. ވަޒީރު މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވުންނެވެ. މި ވަގުތު ދެ މީހަކަށް މަރުގެ ޙުކުމް ތަންފީޛު ކުރެވޭ ހިސާބަށް ކަންކަން ގޮސްފައިވާ ކަމަށްވެސް ވަޒީރު ހާމަކުރެއްވިއެވެ.
"އަޅުގަނޑުމެން މިހާރު ހުރިހާ ކަންތައްތަކެއް ނިމި، އަޅުގަނޑު ހަނދާންވާ ގޮތުން ނަމަ، ސުވާލު ނުއުފެދޭ މިންވަރަށް ދެމީހެއްގެ މައްސަލަ އެބަ އުޅޭ،" ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، މަރުގެ ޙުކުމް ތަންފީޛު ކުރުމަށްޓަކައި ބަލަންޖެހޭ ހުރިހާ މިންގަނޑުތަކެއް ބަލާފައިވާ ކަމަށެވެ. މީގެ ތެރޭގައި ކޯޓުގެ ހުރިހާ މަރުޙަލާއެއް ނިންމާ، އިޔާދަ ނުކުރެވޭ އަދަބެއްގެ ގޮތުގައި މަރުގެ ޙުކުމް ކަނޑައެޅިފައިވާކަން ކަށަވަރު ކުރުން ހިމެނެއެވެ.
Advertisement
މިހާރު ދެން އޮތީ ތަންފީޛީ މަރުޙަލާ ކަމަށާއި، އެއަށް ހަދަންޖެހޭ އުޞޫލުތަކާއި ޤަވާޢިދުތައް ހަދައި، ތަން ތައްޔާރުކޮށް، މީހުންވެސް ތަމްރީނު ކުރަމުންދާ ކަމަށް ވަޒީރު ވިދާޅުވިއެވެ. އަދި މިމަސައްކަތް ނިމޭހާ އަވަހަކަށް، މަރުގެ ޙުކުމް ތަންފީޛު ކުރާނެ ކަމަށްވެސް އޭނާ ޔަޤީންކަން ދެއްވިއެވެ.
ރާއްޖެއަކީ އިސްލާމީ ޤައުމެއްކަމާއި، ރާއްޖޭގައި ކަނޑައެޅޭ ޙުކުމްތައް އިސްލާމް ދީނުގައި އޮންނަ ގޮތަށް ތަންފީޛު ކުރާނެ ކަން ރާއްޖޭގެ ހިއުމަން ރައިޓްސް ރިވިއުގައި ވެސް އަންގާފައިވާ ކަމަށް ވަޒީރު ފާހަގަކުރެއްރެއްވިއެވެ.
މިއީ މީގެ ކުރީގެ ސަރުކާރުތަކުންވެސް މަސައްކަތް ކޮށްފައިވާ ކަމެއް ނަމަވެސް، މިހާތަނަށް އެއްވެސް ސަރުކާރަކަށް މަރުގެ ޙުކުމް ތަންފީޛު ކުރުމަށް ކާމިޔާބުވެފައެއް ނުވެއެވެ. މިވަގުތު ރާއްޖޭގެ ސުޕްރީމް ކޯޓުން މަރުގެ ޙުކުމް އިއްވާފައިވާ ފަސް މީހުން ތިބީ މުޅި އުމުރަށް ޖަލުގައި ބަންދުކޮށްފައެވެ.
ފާއިތުވި ދުވަސްތަކުގައި، އިސްލާމީ ޝަރީއަތުގައި ކަނޑައަޅާފައިވާ ޤިޞާޞް ހިފުން ރާއްޖޭގެ ޤާނޫނު އަސާސީގައި އޮތީ ތަންފީޛު ކުރުމަށް ހުރަސް އެޅޭގޮތަށް ކަމަށްބުނެ، އެ ހުރަސް ކުރިމަތިވާ މާއްދާ ސުޕްރީމް ކޯޓުން ވަނީ ބާޠިލްކޮށްފައެވެ. މިކަމާއި ގުޅިގެން މަރުގެ ޙުކުމް ތަންފީޛު ކުރުމަށް އިތުރު ފުރުޞަތު ލިބިގެންދާނެ ކަމަށް ބެލެވެއެވެ.
