ފަތުރުވެރިކަމެއް ކުރެވޭނީ އެ ދާއިރާ ސިންދަފާތުކޮށް، ދާއިރާއަށް ދިމާވާ ދަތިތައް ދެނެގަނެވިގެން ކަމަށް ފަތުރުވެރިކަމާބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ.
ވަޒީރު މިހެން ވިދާޅުވީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އިންތިޒާމްކޮށްގެން ބޭއްވި މޯލްޑިވް ޓޫރިޒަމް ސިމްޕޯޒިއަމް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ވަޒީރު ފާހަގަކުރެއްވި ގޮތުގައި މި ސިމްޕޯޒިއަމްގެ ސަބަބުން ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް އެއްތަނަކަށް އެއްވެ ޚިޔާލާއި މަޝްވަރާ ބަދަލުކުރުމުގެ ފުރުޞަތު ލިބިގެންދާނެއެވެ. އަދި މީގެ ސަބަބުން ދާއިރާގައި ދިމާވާ ދަތިތައް ދެނެގަނެވި، ރާއްޖޭގެ ފަތުރުވެރިކަމުގެ ދާއިރާ ސިންދަފާތުކުރުމަށް ކުރެވޭނެ ކަންކަން ދެނެގަންނަން ފަސޭހަވާނެ ކަމަށްވެސް ވަޒީރު ވިދާޅުވިއެވެ.
Advertisement
"މި ޤައުމުގައި ފަތުރުވެރިކަން ދެމެހެއްޓުމަށް އުފެއްދުންތެރި ގޮތްތައް ބޭނުންކުރަންޖެހޭ. މި ސިމްޕޯޒިއަމްގައި ފަތުރުވެރިކަމުގެ ދާއިރާ ސިންދަފާތުކުރުމާއި ދާއިރާ ކުރިއެރުވޭނެ ގޮތްތަކާއި އެކި ބާވަތްތަކުގެ ފަތުރުވެރިކަން ރާއްޖެއަށް ތަޢާރަފްކުރުމާ ބެހޭގޮތުން މަޝްވަރާކުރެވޭނެ." ވަޒީރު ވިދާޅުވިއެވެ.
މި ސިމްޕޯޒިއަމްގައި ރިސޯޓްތަކާއި ގެސްޓްހައުސްތަކާއި ޓްރެވަލް އެޖެންޓޖެންޓުންގެ އިތުރުންވެސް ފަތުރުވެރިކަމުގެ ދާއިރާގައި މަސައްކަތްކުރާ ގިނަ އަދަދެއްގެ ފަރާތްތައް ބައިވެރިވެއެވެ.
މި ސިމްޕޯޒިއަމަކީ އެމްއެމްޕީއާރުސީން އިސްނަގައިގެން ބާއްވާ ފުރަތަމަ ސިމްޕޯޒިއަމް ކަމަށްވާއިރު، މީގެ މަޤްޞަދަކީ ފަތުރުވެރިކަމުގެ ދާއިރާގައި ހިމެނޭ އެކި ފަރާތްތަކުގެ މެދުގައި މަޝްވަރާކޮށް، ދާއިރާ އިތުރަށް ކުރިއެރުވުމަށް ކުރެވިދާނެ ކަންކަން ދެނެގަތުމެވެ.
