ކޮމަންވެލްތު އިސްވެރިންގެ ބައްދަލުވުމުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް މިއަދު ސަމޯއާއަށް ވަޑައިގެންފިއެވެ. މި މަހުގެ 21 އިން 26 އަށް ކުރިއަށްދާ މި ބައްދަލުވުމުގައި ނައިބު ރައީސް ގިނަ ދަންފަޅިތަކެއްގައި މުހިންމު ބަޔާންތަކެއް އިއްވަވާނެ ކަމަށް ލަފާކުރެވެއެވެ.
ނައިބު ރައީސްގެ މި ދަތުރުފުޅުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވާކަން ފާހަގަކޮށްލެވެއެވެ. މި ބައްދަލުވުމަކީ ބައިނަލްއަޤުވާމީ ފެންވަރެއްގައި އިޤްތިޞާދީ، މޫސުމީ އަދި ސަލާމަތީ ގޮންޖެހުންތަކާ ކުރިމަތިލުމަށް އެކުގައި މަސައްކަތްކޮށް، ވިލުންތެރިކަމާއި، ވިޔަފާރި ކުރިއެރުވުމާއި ދެމެހެއްޓެނިވި ކުރިމަގެއް ބިނާކުރުމަށް މަޝްވަރާކޮށް ގޮތް ނިންމުމަށް، މެންބަރު ޤައުމުތަކަށް ލިބޭ މުހިންމު ފުރުޞަތެއްކަމަށް ސަރުކާރުން ވަނީ ފާހަގަކުރައްވާފައެވެ.
މީގެ އިތުރުން، މި އަހަރުގެ ބައްދަލުވުމަކީ ކޮޕް 29ގެ ކުރިން، ދެމެހެއްޓެނިވި ތަރައްޤީ އާއި މޫސުމަށް އަންނަ ބަދަލުތަކާ ގުޅުންހުރި ފިޔަވަޅުތަކާމެދު މަޝްވަރާކުރުމަށް މެންބަރު ޤައުމުތަކަށް ލިބޭ މުހިންމު ފުރުޞަތެއްކަމަށް ވެސް ސަރުކާރުން ވަނީ ފާހަގަކުރައްވާފައެވެ. މި ބައްދަލުވުމުގައި ދިވެހިރާއްޖެ ތަމްސީލުކުރެއްވުމަށް ނައިބު ރައީސް ވަޑައިގަތުމަކީ ޤައުމީ އަދި ބައިނަލްއަޤުވާމީ ފެންވަރުގައި ދިވެހިރާއްޖެއަށް ލިބޭ މުހިންމު ފުރުޞަތެއްކަން ފާހަގަކުރެވެއެވެ.
