އެސެޓް ބެކްޑް އޮންލައިން ފައިސާއާ ގުޅޭ ގަވާއިދެއް އެކުލަވާލުމުގެ މަސައްކަތް ކުރަމުންދާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޑެޕިއުޓީ ގަވަރުނަރު އަޙްމަދު އިމާދު ވިދާޅުވެއްޖެއެވެ. މިކަން އިމާދު ހާމަކުރެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ބިޒްނަސް ސްކޫލްގެ ދަރިވަރުންނަށް އަމާޒުކޮށް އެމްއެމްއޭއިން ބޭއްވި ޕެނަލް ޑިސްކަޝަނެއްގައި ވާހަކަދައްކަވަމުންނެވެ.

އިމާދު ވިދާޅުވީ ދިވެހި ރުފިޔާގެ ބަދަލުގައި އަމިއްލަ ވިޔަފާރިތަކުން ތަޢާރަފްކުރާ ރުފިޔާ ބެކްޑް ނުވަތަ އެސެޓް ބެކްޑް އޮންލައިން ފައިސާ ރާއްޖޭގައި ބޭނުންކުރުމާ ގުޅޭ ޖޮއިންޓް ރެގިއުލޭޓަރީ ފްރޭމްވޯކެއް ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އާ ގުޅިގެން އެކުލަވާލުމުގެ މަސައްކަތް ކުރަމުންދާ ކަމަށެވެ.

"އެސެޓެއް ބެކްޓު ކޮއިންސްއަށް މި ފުރުޞަތުދެނީ، މި ޤަވާޢިދާއި އެކު ރާއްޖޭގެ މަރކެޓަށް ވަރޗުއަލް އެސެޓްސް ފޯރުކޮށްދޭނެ މެކޭނިޒަމެއް ނުވަތަ ލައިސެންސިންގ މެކޭނިޒަމެއް، ކުރިއޭޓުވެގެން އަންނާނީ،" އިމާދު ވިދާޅުވިއެވެ.

އިމާދު އިތުރަށް ވިދާޅުވީ ރާއްޖޭގެ މާލީ ނިޒާމު ޑިޖިޓަލްކުރުމަށް އެމްއެމްއޭއިން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން މަދު ސިކުންތުކޮޅެއްގެ ތެރޭގައި އެއް ބޭންކުން އަނެއް ބޭންކަށް ފައިސާ ޖަމާކުރެވޭނެ ނިޒާމެއް ކަމަށްވާ މޯލްޑިވްސް އިންސްޓަންޓް ޕޭމަންޓް ސިސްޓަމް "ފަވަރަ" ވަނީ ގާއިމްކޮށްފައެވެ.

ނަމަވެސް އިމާދު ވިދާޅުވީ އަމިއްލަ ފަރާތްތަކުން ރުފިޔާ ނުވަތަ އެސެޓަކަށް ބެކް ނުކޮށް ފޯރުކޮށްދޭ ކްރިޕްޓޯ ކަރަންސީއަށް މަރުކަޒީ ބޭންކުން ހިތްވަރުނުދޭނެ ކަމަށެވެ. އެއީ ކްރިކްރިޕްޓޯ ކަރަންސީއަކީ އެއްވެސް ބައެއްގެ ކޮންޓްރޯލެއް އޮންނަ ފައިސާއެއް ނޫން ކަމަށް ވާތީއެވެ.