ދ. ކުޑަހުވަދޫގައި ހިނގަމުންދާ އަމާންވެށީގެ ވަސީލަތްތައް ތަރައްޤީކުރުމުގެ މަޤްސަދުގައި އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ސޮއިކޮށްފައިވަނީ ޕަލްސް ހޮޓެލްސް އެންޑް ރިސޯޓްސް އާއި، މަންޓާ އެއަރ އަދި ދާލު އެއާރޕޯޓުގެ އިޖުތިމާޢީ ހަރަކާތްތައް ކުރިއަރުވާ ޖަމިއްޔާ، ދަ ނޯޓިލަސް ފައުންޑޭޝަނާއި މިނިސްޓްރީ އޮފް ސޯޝަލް އެންޑް ފެމިލީ ޑިވަލޮޕްމެންޓް ދެމެދުގައެވެ. މި އެއްބަސްވުމުގައި ސޮއިކޮށްފައިވަނީ 2024 ވަނަ އަހަރުގެ އޮކްޓޯބަރު މަހުގެ 15 ވަނަ ދުވަހުގައި ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން މައުލޫމާތު ދީފައިވެއެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނިގޮތުގައި، މި އެއްބަސްވުމުގެ ދަށުން ނޯޓިލަސް ފައުންޑޭޝަންގެ އެހީއާއިއެކު ދ. އަމާންވެށީގެ ގޯތިތެރޭގައި ޒަމާނީ ފެންވަރުގެ ޓަރފް ދަނޑެއް ޤާއިމުކުރެވޭނެއެވެ. އަދި ހަމައެއާއެކު، އަމާންވެށި އިމާރާތުގައި ކުދިން ކިޔަވާނެ ޒޯނެއް ތަރައްޤީ ކުރުމަށްޓަކައި ލައިބްރަރީ އޭރިއާއެއް ހެދުމާއެކު، ކޮމްޕިއުޓަރ ސިސްޓަމްތަކާއި ކުދިން ކިޔަވާނެ ފޮތް ފަދަ ތަކެތި މި އެއްބަސްވުމުގެ ދަށުން ދިނުމަށް ހަމަޖެހިފައިވާ ކަމަށް ވުޒާއިން ހާމަކުރިއެވެ.
މި އެއްބަސްވުމުގައި ސޮއިކުރުމުގެ ރަސްމިއްޔާތުގައި ކުޑަހުވަދޫ ދާއިރާގެ މަޖްލިސް މެމްބަރ ޙުސެއިން ޙަމީދާއި ދ.އަތޮޅުގެ ކައުންސިލް ރައީސް އަޙްމަދު ޝާފިއު އާއި، މަންޓާ އެއާރގެ ޑެޕިއުޓީ ސީ.އީ.އޯ އަޙްމަދު މައުމޫންގެ އިތުރުން ނޯޓިލަސް ފައުންޑޭޝަން ގެ ސެކްރެޓަރީ ޖެނެރަލް މުޙައްމަދު ހަލީލާއި، އެ ފައުންޑޭޝަން ގެ ލީޑް އައިޝަތު އިހުމާ އަދި ދ. ފެމިލީ އެންޑް ޗިލްޑްރަން ސަރވިސަސްގެ އިސްވެރިން ބައިވެރިވެ ވަޑައިގެންނެވިއެވެ.
Advertisement
ދ.އަމާންވެށީގެ ޚިދުމަތްތައް ފުޅާކޮށް ތަރައްޤީކުރުމަށް އެޅިގެންދިޔަ މި މުހިންމު ފިޔަވަޅަކީ އަމާންވެށީގައި ޚިދުމަތް ފޯރުކޮށްދޭ ކުދިންނަށް ތަޢުލީމާއި، ދުޅަހެޔޮކަމާއި އަދި މުނިފޫހިފިލުވުން ކުރިއެރުވުމަށް ކުރެވުނު މުހިންމު މަސައްކަތެއްކަމަށް ވެގެންދާނެ ކަމަށް ވުޒާއިން ފާހަގަކުރިއެވެ، މި މަޝްރޫޢުގެ ސަބަބުން އަމާންވެށީގައި ތިބޭ ކުދިންނަށް ލިބޭ ޚިދުމަތްތަކުގެ ފެންވަރު މަތިވެ، އެ ކުދިންގެ ދިރިއުޅުމުގެ ފެންވަރު ރަނގަޅުވެގެންދާނެކަމަށް އުންމީދު ކުރާކަމަށް ވެސް ވުޒާއިން ބުންޏެވެ.
