ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އދ.ގެ 79 ވަނަ ބައްދަލުވުމަށް އެމެރިކާއަށް ކުރެއްވެވި ރަސްމީ ދަތުރުފުޅުތަކުގެ މާލީ ހިސާބުތައް ހާމަކުރައްވައިފިއެވެ.

ރައީސް އޮފީހުން ހާމަކުރެއްވި ޢަދަދުތަކުން އެނގޭގޮތުގައި ކުރީގެ ވެރިކަމާއި ޚިލާފަށް ރައީސް ޑރ. މުޙައްމަދު މުޢިއްޒު ވަނީ ޚަރަދު ކުޑަކުރެއްވުމުގެ ގޮތުން ފަސްޓް ކުލާހުގެ ބަދަލުގައި ބިޒްނަސް ކްލާސް ޚިޔާރުކޮށް، މާ އާދައިގެ އެކޮމޮޑޭޝަންތަކެއްގައި އަވަހާރަފުޅުލައްޕަވާފައެވެ. ލަގްޒަރީ ޕްރެޒިޑެންޝަލް ސުއިޓްތަކުގެ ބަދަލުގައި އެމަނިކުފާނު އިޚްތިޔާރު ކުރެއްވީ ދެ ހޮޓަލުގެ ކޮޓަރިތަކެވެ. މުޅި ދަތުރުފުޅުގެ ޖުމްލަ ޚަރަދަކީ (2,455،583.01) ދެ މިލިއަން ހަތަރުލައްކަ ފަންސާސް ފަސްހާސް ފަސް ސަތޭކަ އަށްޑިހަ ތިން ރުފިޔާ، އެއް ލާރި އެވެ.

ނަމަވެސް، އެމަނިކުފާނު ކުރެއްވި ދަތުރުފުޅާއި އަޅާބަލާއިރު ކުރީގެ ރައީސް އިބްރާހިމް މުޙައްމަދު ސޯލިހު 2021 ވަނަ އަހަރު އެމެރިކާއަށް ކުރެއްވި ދަތުރުފުޅަށް ސަރުކާރުން 5.3 މިލިއަނަށް ވުރެ ގިނަ ރުފިޔާ ޚަރަދުވެފައިވާއިރު، 2019 ވަނަ އަހަރުގެ ސެޕްޓެމްބަރު މަހު ވެސް މިފަދަ ދަތުރަކަށް ވަނީ 4.2 މިލިއަން ރުފިޔާއަށް އަރާފައެވެ. މި އަދަދުތަކުން ހާމަވަނީ އިސްރާފު ކުރުމުގެ ބަދަލުގައި ރައީސް ޑރ. މުޢިއްޒު ޚަރަދު ކުޑަ ވެރިކަމެއް ހިންގެވުމަށްޓަކައި ނަމޫނާ ދައްކަވާކަމެވެ.

ޚަރަދު ކުޑަކުރެއްވި ނަމަވެސް، ދުނިޔޭގެ ލީޑަރުންނާއި ބައިނަލްއަޤްވާމީ ޖަމިއްޔާތަކާއި އެމަނިކުފާނު ކުރައްވާ ބައްދަލުވުންތަކަކީ އުފެއްދުންތެރި ބައްދަލުވުންތަކެއް ކަމަށާއި، އިޤްތިޞާދީ ގޮތުންނާއި ޑިޕްލޮމެޓިކް ގޮތުން ރާއްޖެއަށް ފައިދާހުރި، ކުރިއަށް އޮތްތަނުގައި އެއްބާރުލުން ދިނުމަށް މަގުފަހިވެފައިވާ ކަމުގެ ޔަޤީންކަން ރައީސް އޮފީހުން ދީފައިވެ އެވެ.