އިލެކްޝަންސް ކޮމިޝަން (އީސީ) އަށް އައު މެންބަރަކު އައްޔަން ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ރައްޔިތުންގެ މަޖިލީހަށް ނަން ހުށަހަޅުއްވާފައެވެ. މި މަޤާމަށް ރައީސް ހުށަހަޅުއްވާފައިވަނީ އިސްލާމިކް މިނިސްޓްރީގެ ކުރީގެ ޕަރމަނަންޓް ސެކްރެޓަރީ އަބްދުލް ހަސީބު އިސްމާއިލްގެ ނަމެވެ.
ރައީސް މުއިއްޒު މަޖިލީހަށް ފޮނުއްވި ސިޓީގައި ވިދާޅުވެފައިވަނީ، އިލެކްޝަންސް ކޮމިޝަންގެ މިހާރުގެ ރައީސް ފުއާދު ތައުފީގުގެ ދައުރު އަންނަ ނޮވެމްބަރު 24 ވަނަ ދުވަހު ހަމަވާތީ، އެ މަޤާމަށް ކުރިމަތިލުމުގެ ފުރުޞަތު ހުޅުވާލެވުނު ކަމަށެވެ. އަދި އެ މުއްދަތުގައި މަޤާމަށް ހުށަހެޅުއްވި ފަރާތްތަކުގެ ތެރެއިން އީސީއަށް އައްޔަން ކުރުމަށް އެންމެ އެކަށީގެންވާ ފަރާތަކީ ހަސީބު ކަމަށް ފެނިވަޑައިގަންނަވާ ކަމަށް ރައީސް ވަނީ ސިޓީގައި ފާހަގަކުރައްވާފައެވެ.
މި މައްސަލަ ބެލުމަށް މަޖިލީހުގެ ރިޔާސަތުން ވަނީ މިނިވަން މުއައްސަސާތަކުގެ ކޮމިޓީއަށް ފޮނުވާފައެވެ.
Advertisement
ހަސީބަކީ ކުރީގެ ރައީސް އިބްރާހިމް މުޙައްމަދު ޞާލިޙްގެ ސަރުކާރުގައި 2019 ވަނަ އަހަރު އިސްލާމިކް މިނިސްޓްރީގެ ޕަރމަނަންޓް ސެކްރެޓަރީގެ މަޤާމަށް އައްޔަން ކުރެވުނު ފަރާތެކެވެ.
