ޣައްޒާގެ ހަނގުރާމައާއި ގުޅޭގޮތުން ހައްދުފަހަނައެޅި އިސްރާއީލުން ހަދާފައިވާ އައު ޕްލޭނެއްގެ ކޮޕީއެއް އެސޯސިއޭޓެޑް ޕްރެސް ، އޭޕީ އަށް ލިބި އެ ޕްލޭނުގައިވާ ބައެއް ކަންތައްތައް ލީކު ކޮށްލައިފިއެވެ.

އެސޯސިއޭޓެޑް ޕްރެސް (އޭޕީ) އަކީ އިތުބާރު ހުރި ޚަބަރުތައް ފޯރުކޮށްދިނުމުގައި މަޝްހޫރު ނޫސްވެރިންގެ ނެޓްވޯކެކެވެ. 1846 ވަނަ އަހަރުން ފެށިގެން ވަކި ފަރާތަކަށް ނުޖެހި ޚަބަރުތައް ގެނެސްދޭ ދިގު ތާރީހެއް އޮތުމުން އެސޯސިއޭޓެޑް ޕްރެސްއަށް ވަރަށް އިތުބާރު ކުރެވެއެވެ.

އެމެރިކާގެ އޭޕީން ބުނި ގޮތުގައި އެމީހުންނަށް ލިބިފައިވާ އެ ޕްލޭނުގައި ވާގޮތުން ޣައްޒާގެ އުތުރުގައި ދިރިއުޅޭ ރައްޔިތުންނަށް ފެން، ބޭސް އަދި ކާބޯތަކެތި ލިބޭގޮތް މުޅިން ހުއްޓުވަން ޖެހޭ ކަމަށް އިސްރާއީލުން އޮތީ ޣައްޒާގައި ހަނގުރާމަކުރާ އިސްރާއީލުގެ ފޯސްއަށް އަންގާފައެވެ. މި ޕްލޭނުގައި ވާގޮތުން ޣައްޒާގެ އުތުރުގައި ދިރިއުޅޭ މުސްލިމުންނަށް އެއްވެސް ކަހަލަ އިންސާނީ އެހީއެއް ފޯރުކޮށްދީގެން ނުވާނެއެވެ. އޭރުން ބަނޑަށް ޖެހިދާނެތީވެ ޣައްޒާގެ އުތުރުގައި ދިރިއުޅޭ ރައްޔިތުންނަށް އެމީހުންގެ ގެދޮރު ދޫކޮށް އެހެން ތަނަކަށް ދިޔުމަށް މަޖުބޫރު ވާނެއެވެ. 

އެ ޕްލޭނުގައި ވާގޮތުން ގެދޮރު ދޫކޮށްލަން ބޭނުންނުވާ ކޮންމެ މީހަކީ ހަނގުރާމަވެރިއެއް ކަމަށް ގިންތި ކުރެވޭނެއެވެ. 

މި ޕްލޭނަށް ޢަމަލުކުރެވިއްޖެނަމަ ފަލަސްޠީނުގެ އެތައް ހާސް ރައްޔިތުން ވަށާލުން އިތުރަށް އެމީހުންނާއި ދެކޮޅަށް އެއްގަމުންނާއި ވައިގެމަގުން ހަމަލާދީ އެމީހުން ޝަހީދުކޮށްލުމުގެ ފުރުޞަތު އިސްރާއީލުގެ ފޯސްއަށް ލިބޭނެއެވެ.

އިސްރާއީލުގެ ހަނގުރާމަވެރިން މިހާރު ތިބީ ޣައްޒާގެ އުތުރުގައި އޮންނަ ޖަބަލިޔާ ވަށާލާފައެވެ. ޖަބަލިޔާ ވަށާލާފައި އޮންނަތާ މިހާރު ހަފްތާއެއް ވީއެވެ. ބެލެވޭ ގޮތުގައި އޭޕީއަށް ލިބުނު ކޮޕީއަކީ ޖަބަލިޔާއާއި ގުޅުންހުރި ޕްލޭނަކަށް ވެދާނެއެވެ. ޖަބަލިޔާ ވެސް އޮންނަނީ ޣައްޒާގެ އުތުރުގައެވެ. އެ ސިޓީއަކީ އިސްރާއީލު އުފެއްދުމަށްފަހު 1948 ވަނަ އަހަރު އުފެއްދި ޣައްޒާގެ އެންމެ ބޮޑު ރެފިއުޖީ ކޭމްޕެވެ. އެތަނާއި އިސްރާއީލު ބޯޑަރާއި ވެސް ނުލާހިކު ކައިރިއެވެ. ގާތްގަނޑަކަށް ދެތިން ކިލޯމީޓަރެވެ. ރެފިއުޖީ ކޭމްޕް ހިމެނޭ ގޮތަށް ޖަބަލިޔާގެ އާބާދީއަކީ ގާތްގަނޑަކަށް 200،000 އެއްހާ މީހުންނެވެ.

އިސްރާއީލުން ޖަބަލިޔާއަށް ވަދެ ނުކުމެވޭ ސަރަހައްދުތައް ވެސް އިއްޔެ ނޫން ކުރީ ދުވަހު ބަންދުކޮށްފައިވާ ކަމަށް ފަލަސްޠީނުގެ މަސްދަރުތަކުން ބުނެއެވެ. އަދި އިސްރާއީލުގެ ސިފައިންނަށް ޖަބަލިޔާގައި ހަމަލާ ވެސް ދޭތެރެދޭތެރެއިން ދަނީ ދެމުންނެވެ. ޚުލާސާއަށް އެކި މަސްދަރުތަކުން ލިބިފައިވާ ވީޑިއޯ ތަކުގައި އިސްރާއީލު ސިފައިންނާއި ދެކޮޅަށް ޖަބަލިޔާ ތެރޭގައި ފިލައި ތިބެގެން ހަމަލާދޭ މަންޒަރު ފެނެއެވެ.