ދިވެހިރާއްޖޭގެ ޒުވާނުންނަށް އިސްލާމްދީނާއި ޤައުމީ އައިޑެންޓިޓީ ދެނެގަތުމަށް ރައީސް ޑރ. މުޙައްމަދު މުޢިއްޒު ގޮވާލައްވައިފިއެވެ. ދިވެހިރާއްޖެ އިސްލާމްވުން ފާހަގަކުރުމުގެ ގޮތުން މިއަދު ދަރުބާރުގޭގައި ބޭއްވި ހާއްސަ ޖަލްސާގައި އެމަނިކުފާނު ވަނީ ރާއްޖޭގެ ތާރީޚާއި ޒަމާނުއްސުރެ އޮތް މިނިވަންކަމާ ބެހޭ ގޮތުން ޒުވާން ޖީލަށް ދަސްކޮށްދިނުމުގެ މުހިންމުކަމަށް އަލިއަޅުއްވާލައްވާފައެވެ.
ރައީސް ޑރ. މުއިއްޒު ފާހަގަކުރެއްވި ގޮތުގައި ޒުވާނުންނަކީ ބޭރުގެ ނުރައްކާތަކާ ދެކޮޅަށް ތެދުވެ، ޖިންސަށް ބަލައިގެން ތަފާތުކުރުމެއް ނެތި ގައުމީ ތަރައްގީއާ ދިމާލަށް މަސައްކަތް ކުރަންޖެހޭ ބައެކެވެ. އަދި ޒުވާން ޖީލުގެ އަޚްލާޤީ އަދި ރޫޙާނީ ދުޅަހެޔޮކަން ހަރުދަނާ ކުރުމުގެ މުހިންމުކަމުގެ މައްޗަށް އެމަނިކުފާނު އަލިއަޅުއްވާލެއްވިއެވެ.
ޤުރުއާނާއި ސުންނަތުގައި ބަޔާންކޮށްފައިވާ އިސްލާމީ އުނގަންނައިދިނުންތަކާ ބެހޭ ގޮތުން ޒުވާނުންނަށް ތަރުބިއްޔަތު ދިނުމަށް ހުރިހާ މަސައްކަތެއް ވެސް ކުރަން ޖެހޭ ކަމަށް ރައީސް އިލްތިމާސް ކުރެއްވިއެވެ. އަދި މި އުސޫލުތަކުގެ މައްޗަށް ބިނާވެފައިވާ މުޖުތަމަޢަކަށް ރާއްޖެ ބަދަލުވާންޖެހޭ ކަމުގެ މުހިއްމުކަން އެމަނިކުފާޏު ފާޙަގަ ކުރެއްވިއެވެ. ރަނގަޅު ދިވެހި މުޖުތަމަޢެއް ބައްޓަން ކުރުމަށްޓަކައި ހުރިހާ ދާއިރާއަކުން ޤައުމީ އެއްބައިވަންތަކަމާއި އެއްބާރުލުން ދިނުމަށް ހިތްވަރު ދެއްވުމުގެ އިތުރުން މުޙައްމަދު ނަބިއްޔާ ޞައްލަﷲ ޢަލައިހި ވަސައްލަމަގެ މަތިވެރި ސިފަތަކަކީ ޤައުމަށް މަގުދައްކައިދޭ ނަމޫނާއަކަށް ވާންޖެހޭނެކަން އެމަނިކުފާނު ހަނދާންކޮށްދެއްވިއެވެ.
