ކޮވިޑު-19 އެހީގެ ގޮތުގައި ފީފާއިން ރާއްޖޭގެ ކުލަބުތަކަށް ދިން ފައިސާއިން އެފްއޭއެމްގެ ކުރީގެ ރައީސް ބައްސާމް އަދީލް ޖަލީލު ގަތް ދެ ޕެންޓްހައުސް ނުވަތަ އެޕާޓްމަންޓްތައް ފުލުހުންނާ ޙަވާލުކުރަން އަންގައިފިއެވެ.
ފުލުހުން ފޮނުވާފައިވާ ނޯޓިސްގައި ވަނީ ބައްސާމްގެ ދެ ޕެންޓްހައުސް އަންނަ އާދިއްތަ ދުވަހުގެ ކުރިން ފުލުހުންނާ ޙަވާލުކުރުމަށާއި އަދި އެ ދުވަހުގެ ކުރިން އެ ތަންތަން ފުލުހުންނާ ޙަވާލު ނުކޮށްފި ނަމަ، އެ އިދާރާގެ ބެލުމުގެ ދަށަށް އެ ތަންތަން ނަގާނެ ކަމަށެވެ.
ހުޅުމާލޭގައި ހުންނަ އަމީން އެވެނިއު އިން ބައްސާމް ގަތް އެ ދެ ޕެންޓްހައުސް ހުންނަނީ ތަނުގެ އުސޫލާ ޚިލާފަށް ގުޅުވާލާފައެވެ.
Advertisement
ކޮވިޑުގެ ދުވަސްވަރު ފީފާއިން ދިން އެއް މިލިއަން ޑޮލަރު މާރުކުރުމަށްފަހު ބައްސާމް ހުޅުމާލޭ އަމީން އެވެނިއުއިން ދެ އެޕާޓްމަންޓް ގަތް މައްސަލާގައި އޭނާއާއި އިތުރު ދެ މީހެއްގެ މައްޗަށް ދަޢުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވެއެވެ.
ފުލުހުންގެ ތަހުޤީޤަށް ލިބުނު މަޢުލޫމާތުތަކާއެކު ދަޢުވާކުރުމަށް ފޮނުވާފައިވަނީ ބައްސާމުގެ އިތުރުން އަމިން ކޮންސްޓްރަކްޝަން އާއި، އެފްއޭއެމްގެ އޭރުގެ ފައިނޭންސް ހެޑް މުހައްމަދު އަގީލް އަދި އެފްއޭއެމްގައި އޭރު އިސްކޮށް އުޅުނު ހަސަން ވަހީދުގެ މައްޗަށެވެ.
ފުލުހުން މި މައްސަލަ ތަހުޤީޤުކުރަން ފެށީ މިދިޔަ އަހަރުގެ ތެރޭގައެވެ.
ފުލުހުން ބުނީ އެއް މިލިއަން ޑޮލަރަކީ ކޮވިޑުގައި ކްލަބްތަކަށް ދިމާވި މާލީ ދަތިކަން ހައްލުކޮށްދޭން ކަމަށް ބުނެ ފީފާ އަތުން އެފްއޭއެމް ނެގި 1.9 މިލިއަން ޑޮލަރުގެ ކޮވިޑް ރިލީފް ލޯނުގެ ފައިސާކަން ތަހުޤީޤށް ފާހަގަވެފައިވާ ކަމަށެވެ.
އެފްއޭއެމްގެ އެކައުންޓުން ބައްސާމް އޭނާގެ އަމިއްލަ އެކައުންޓަށް 10،000 ޑޮލަރު ޖަމާކޮށް، އެ ފައިސާއަށް ހިޔާނާތްތެރި މައްސަލައިގައި ވެސް އޭނާގެ މައްޗަށާއި އަގީލްގެ މައްޗަށް ދައުވާކޮށްދޭން ޕީޖީ އޮފީހަށް މި އަހަރުގެ ކުރީކޮޅުގައި ފުލުހުން ވަނީ ހުށަހަޅާފައެވެ.
ފުލުހުން ބުނެފައިވާ ގޮތުގައި، އެފްއޭއެމަށް ބޭރުގެ ފަރާތްތަކުން އެހީގެ ގޮތުގައި ދޭ ޑޮލަރު އެ އެސޯސިއޭޝަނުގެ އިސްވެރިންނާއި އެސޯސިއޭޝަނާ ގުޅުން އޮންނަ ފަރާތްތަކާއި ކުންފުނިތަކުގެ އެކައުންޓަށް ޖަމާކޮށް ނަހަމަ ގޮތުގައި ބޭނުންކޮށް މަނީ ލޯންޑަރިންގެ ޢަމަލުތައް ހިންގުމުގެ އެތައް މައްސަލައެއް މިދިޔަ އަހަރުގެ އޮކްޓޫބަރުން ފެށިގެން ތަހުޤީޤުކުރަމުން އަންނަ ކަމަށެވެ.
