ރާއްޖެއަށް އެންމެ ގިނަ ފަތުރުވެރިން އަންނަ ވިންޓަރ ސީޒަން ނުވަތަ ފިނި މޫސުމަށް ތައްޔާރުވުމުގެ މަސައްކަތް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ފަށައިފިއެވެ.

އެމްއޭސީއެލް އިން ބުނީ ފިނި މޫސުމަށް ތައްޔާރުވުމުގެ ގޮތުން އެއަރޕޯޓް އޮޕަރޭޝަންސް ޑިވިޜަނުން މިއަދު ޚާއްސަ ބައްދަލުވުމެއް ބާއްވާފައިވާ ކަމަށާއި މި ބައްދަލުވުމުގެ މައިގަނޑު މަޤުޞަދަކީ ކުރިއަށް އޮތް ފަތުރުވެރިކަމުގެ ސީޒަނުގައި އެއަރޕޯޓް އޮޕަރޭޝަނަށް ދިމާވެދާނެ ގޮންޖެހުންތަކާ ބެހޭގޮތުން މަޝްވަރާކޮށް، އެކަންކަން ޙައްލުކުރުމަށް ކުރެވިދާނެ މަސައްކަތްތައް އިންތިޒާމް ކުރުން ކަމަށެވެ.

މި ބައްދަލުވުމުގައި އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު، ޑެޕިއުޓީ މެނޭޖިންގ ޑިރެކްޓަރ މުޖްތަބާ ލަތީފް އަދި ކުންފުނީގެ އެހެނިހެން އިސްވެރިން ބައިވެރިވެވަޑައިގެންނެވިއެވެ.

މި ބައްދަލުވުމުގައި ޝަރީފް ވިދާޅުވީ ވިންޓަރ ސީޒަނަށް ތައްޔާރުވުމުގެ ގޮތުން އައު ބެގޭޖް ހޭންޑްލިންގ ސިސްޓަމެއް ތަޢާރަފުކުރުމަށް ރޭވިފައިވާކަމަށާއި މި ސިސްޓަމުގެ ސަބަބުން އެއަރޕޯޓުގެ މަސައްކަތްތައް އިތުރަށް ހަލުވިވެ، ފަސިންޖަރުންނަށް ދެވޭ ޚިދުމަތުގެ ފެންވަރު ރަނގަޅުވެގެންދާނެ ކަމަށެވެ.

މީގެ އިތުރުން ކުންފުނީގެ ލަނޑުދަނޑިތަކާ އެއްގޮތަށް މުވައްޒަފުންނާއި މެނޭޖްމަންޓް ގުޅިގެން މަސައްކަތްކުރާނެ ކަމަށާއި، އިކުއިޕްމަންޓް އަޕްގްރޭޑްކުރުމާއި ޚިދުމަތްތައް ރަނގަޅުކުރުމަށް އިސްކަންދޭނެ ކަމަށް ވެސް ޝަރީފް ވިދާޅުވިއެވެ.

ކުރިއަށް އޮތް ތަނުގައި މިފަދަ މަޝްވަރާ ބައްދަލުވުންތައް، ކުންފުނީގެ ޙިއްސާދާރުންނާއެކު ވެސް ބާއްވާނެ ކަމަށް އެމްއޭސީއެލް އިން ބުންޏެވެ.