ހުޅުމާލެ ތިންވަނަ ފިޔަވަހީގެ ހުސްބިންތަކުގައި ބަހައްޓާފައި ހުރި ތަކެތި ނެގުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފިއެވެ.
އެޗްޑީސީން ކުރި ޢިއުލާނެއްގައި ބުނެފައިވަނީ ހުޅުމާލެ ދެވަނަ ފިޔަވަހީގެ ޗެނަލް ޕްރޮޖެކްޓް 2 ފެށުމަށް ހަމަޖެހިފައިވާ ސަރަޙައްދު ހުސްކުރުމަށް މިދިޔަ ޖަނަވަރީ މަހުގެ 30 ވަނަ ދުވަހު ޢިއުލާނުކޮށްފައިވާއިރު، ހުޅުމާލެ ދެވަނަ އަދި ތިންވަނަ ފިޔަވަހީގެ ހުސްބިންތަކުގައި ޤަވާޢިދާ ޚިލާފަށް ބަހައްޓާފައި ހުރި ތަކެތި ނެގުމަށް މިދިޔަ މެއި މަހުގެ 8 ވަނަ ދުވަހުވެސް އެންގި ކަމަށެވެ.
ނަމަވެސް ގިނަ ފަރާތްތަކުން އެކަމަށް އިޖާބަދީފައި ނުވާކަމަށް އެޗްޑީސީން ބުންޏެވެ. އެގޮތުން އެޗްޑީސީން ބުނީ ތިންވަނަ ފިޔަވަހީގެ ހުސްބިންތަކުގައި ޤަވާޢިދާ ޚިލާފަށް މުދަލާއި ތަކެތި ބަހައްޓައި ބައެއް ފަރާތްތަކުން އަދިވެސް އެ ބިންތައް ބޭނުންކުރަމުން އަންނަ ކަން ފާހަގަކުރެވިފައިވާ ކަމަށެވެ.
Advertisement
އެޗްޑީސީން މިފަހަރު އަންގާފައިވަނީ ހުޅުމާލެ ތިންވަނަ ފިޔަވަހީގެ ހުސްބިންތަކުގައި ޤަވާޢިދާ ޚިލާފަށް ބަހައްޓާފައި ހުރި މުދަލާއި ތަކެތި، 11 އޮކްޓޯބަރު ވާ ހުކުރު ދުވަހުގެ ކުރިން ނެގުމަށެވެ. އަދި މި މުއްދަތުގެ ތެރޭގައި އެތަކެތި ނުނަގާނަމަ، އެތަކެއްޗަކީ ވެރިފަރާތްތަކުން ބޭނުން ނެތިގެން ދޫކޮށްލާފައިވާ ތަކެތި ކަމަށް ބަލައި، އެ ކޯޕަރޭޝަނުން އެފަދަ ތަކެއްޗާމެދު ޢަމަލުކުރުމަށް ހަމަޖެހިފައިވާ ގޮތުގެ މަތިން ޢަމަލު ކުރެވޭނެ ކަމަށާއި އެ މަސައްކަތުގެ ތެރޭގައި މުދަލަށް ނުވަތަ ތަކެއްޗަށް ލިބިދާނެ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށް އެޗްޑީސީން ބުންޏެވެ.
