ރާއްޖޭގެ ތަޢުލީމީ ނިޒާމު ހަރުދަނާކޮށް، ހުރިހާ ކުދިން ޝާމިލްވާ ވަށާޖެހޭ ތަޢުލީމީ ނިޒާމެއް ޤާއިމްކުރުމަށް ސަރުކާރުން މަސައްކަތް ފަށައިފިއެވެ.

ޓީޗަރުންގެ ބައިނަލްއަޤްވާމީ 7 ވަނަ މާހީސިންތާ ފެށުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން މެޑަމް ސާޖިދާ ވިދާޅުވީ، ތަޢުލީމީ ނިޒާމުގައި ފަންނީއްޔާތު ބޭނުންކުރާ މިންވަރު އިތުރުކުރުމަކީ މި މަޤްޞަދު ހާސިލްކުރުމަށް ކޮންމެހެން ކުރަންޖެހޭ ކަމެއް ކަމަށެވެ. އަދި ރާއްޖޭގެ ޖިއޮގްރަފީއާ ގުޅިފައިވާ ގޮންޖެހުންތަކަށް ޙައްލު ހޯދުމަށް، ތަޢުލީމީ ނިޒާމު ޑިޖިޓަލައިޒްކުރުމަކީ މުހިންމު ކަމެއްކަމަށް އެކަމަނާ ފާހަގަކުރެއްވިއެވެ.

ރާއްޖޭގެ ކޮންމެ ކުއްޖަކަށްވެސް ފެންވަރު ރަނގަޅު ތަޢުލީމެއް ފޯރުކޮށްދިނުމަކީ މި ސަރުކާރުގެ އަމާޒެއް ކަމަށްވާއިރު، ޓެކްނޮލޮޖީގެ ބޭނުން އެންމެ ފުރިހަމައަށް ހިފައިގެން، ހުރިހާ ކުދިންނަށް ހަމަހަމަ ފުރުޞަތުތަކެއް ފަހިކޮށްދިނުމަށް ސަރުކާރުން ކުރަމުންދާ މަސައްކަތް އެކަމަނާ ފާހަގަ ކުރެއްވިއެވެ.

މީގެއިތުރުން، ޓީޗަރުންގެ ދުޅަހެޔޮކަމަށް އިސްކަންދިނުމާއި، އިދާރީ މަސައްކަތްތައް ލުއިކޮށްދިނުމަކީ ކިޔަވައިދިނުމުގެ ފެންވަރު ރަނގަޅުކުރުމަށް އެޅޭނެ މުހިންމު ފިޔަވަޅުތަކެއްކަމަށް އެކަމަނާ ފާހަގަކުރެއްވިއެވެ. މިކަންކަމަށް ރިޢާޔަތްކޮށް، ސަރުކާރުން ވަނީ ޓީޗަރުންގެ މަސައްކަތުގެ ވަގުތު ކުޑަކުރުމާއި، އިދާރީ ޒިންމާތައް ލުއިކޮށްދިނުމަށް ޚާއްޞަ ސަމާލުކަމެއް ދީފައެވެ.

ދެ ދުވަހުގެ މުއްދަތަށް ކުރިއަށްދާ މި މަހާސިންތާގައި 248 ބައިވެރިން ބައިވެރިވެއެވެ. މީގެ ތެރޭގައި އޭ ލެވެލްއަށް ކިޔަވާ ދަރިވަރުންވެސް ހިމެނެއެވެ. މި މަހާސިންތާއަކީ ކޮންމެ ދެ އަހަރަކުން އެއްފަހަރު ބާއްވާ މަހާސިންތާއެކެވެ.