ކުޅިވަރުގެ ދާއިރާއިން މިދިޔަ އަހަރުގެ އެންމެ މޮޅު އެތުލީޓުންނާއި ޓެކްނިކަލް އޮފިޝަލުން ހޮވުމަށް ބާއްވާ "މޯލްޑިވްސް ސްޕޯޓްސް އެވޯޑްސް 2024" މި މަހުގެ 17 ވަނަ ދުވަހު ބޭއްވުމަށް ނިންމާފައިވާ ކަމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން އިއުލާނު ކޮށްފިއެވެ.

މި އެވޯޑް ހަފުލާ ކުރިން ތާވަލުކޮށްފައިވަނީ މިދިޔަ ޖުލައި މަހުގެ ހަތަރުވަނަ ދުވަހުއެވެ. ނަމަވެސް، ސަރުކާރުން މާލީ ހާލަތު ރަނގަޅުކުރުމަށް އެޅި މުހިންމު ފިޔަވަޅުތަކާ ގުޅިގެން އެވޯޑް ހަފުލާގެ މަސައްކަތްއޭރު ފަސްކުރަން ޖެހުނެވެ.

މިނިސްޓްރީގެ އޮފިޝަލަކު ވިދާޅުވިއެވެ. "ސަރުކާރުގެ އިސްނެގުމުގެ ދަށުން، މާލީ ހާލަތު ރަނގަޅުކުރުމަށް އެޅި ފިޔަވަޅުތަކުގެ ސަބަބުން، އަޅުގަނޑުމެންނަށް މިހާރު މި ވަނީ މި މުހިންމު ހަފުލާ ބޭއްވުމުގެ ފުރުސަތު ލިބިފަ. މިއީ ދިވެހި ދިވެހި އެތުލީޓުންނާއި ޓެކްނިކަލް އޮފިޝަލުންގެ ހުނަރާއި ކާމިޔާބީތައް ފާހަގަކޮށް، އެ ފަރާތްތަކަށް ހައްގު ގަދަރު ލިބިދިނުމުގެ މުހިންމު ފުރުސަތެއް."

މިނިސްޓްރީން އިތުރަށް ހާމަކުރި ގޮތުގައި، ރާއްޖޭގެ 18 ކުޅިވަރު އެސޯސިއޭޝަނަކުން މި ފަހަރުގެ އެވޯޑަށް ނަން ހުށަހަޅާފައިވެއެވެ. އަދި ކުޅުންތެރިންގެ ތަފާސްހިސާބުތަކަށް ޕޮއިންޓް ދިނުމުގައި "އޭއައި" ގެ ބޭނުން ހިފާފައިވާކަން ފާހަގަކޮށްފައިވެއެވެ. މިއީ ސަރުކާރުގެ ޑިޖިޓަލައިޒޭޝަން އެޖެންޑާއާ އެއްގޮތަށް އަދި ހަމަހަމަކަމާއެކު ކުރިއަށްގެންދެވޭ ކަމެއްކަމަށް މިނިސްޓްރީން ބުނެފައިވެއެވެ.

މިދިޔަިޔަ އަހަރަކީ ރާއްޖޭގެ ކުޅިވަރުގައި ފާހަގަކޮށްލެވޭ އަހަރެއްކަން މިނިސްޓްރީން ފާހަގަކޮށްފައިވެއެވެ. އިންޑިއަން އޯޝަން އައިލޭންޑް ގޭމްސް (އައިއޯއައިޖީ) އާއި އޭޝިއަން ގޭމްސްގެ އިތުރުން ބައިނަލްއަގުވާމީ ގިނަ މުބާރާތްތަކެއްގައި ދިވެހި އެތުލީޓުންނާއި ޓީމުތައް ވާދަކޮށް، ފާހަގަކޮށްލެވޭ ކާމިޔާބީތަކެއް ހޯދާފައިވާކަން ބަޔާނުގައި ފާހަގަކޮށްފައިވެއެވެ. މިދިޔަ ދެ އަހަރު ދިން ސްޕޯޓްސް ފޮޓޯގްރަފީ އެވޯޑުގެ ބަދަލުގައި މިފަހަރު ދިނުމަށް ނިންމާފައިވަނީ ސްޕޯޓްސް ވިޝުއަލް އާޓިސްޓް އޮފް ދަ އިޔަރގެ ނަމުގައި އެވޯޑެވެ. އެކަމަކު އެހެން އެވޯޑުތަކަށް މި ފަހަރު އެއްވެސް ބަދަލެއް އައިސްފައެއް ނުވެއެވެ.

މޯލްޑިވްސް ސްޕޯޓްސް އެވޯޑުގެ ޖަޖުން ޕެނަލްގައި ހިމެނެނީ:

• ގައުމީ ބާސްކެޓްބޯޅަ ޓީމުގެ ކުރީގެ ކުޅުންތެރިޔާ އަބްދުލް ނާފިއު ތައުފީގު
• ފީފާ އާއި އޭއެފްސީގެ މެޗު ކޮމިޝަަނަރު އަޙްމަދު ޝާހިރު
• ކުރީގެ ފީފާ ރެފުރީ އަލީ ސަލީމް
• ޓޭބަލް ޓެނިސް އެސޯސިއޭޝަންގެ ކުރީގެ ޖެނެރަލް ސެކްރެޓަރީ އިސްމާޢީލް ސުޖާއު
• އަދި ގައުމީ ސްޕޯޓްސް ކައުންސިލުގެ މެންބަރު އާމިނަތު ނާޝިދު