ރާއްޖޭގައި ހޮޓެލް ސްކޫލެއް ތަރައްޤީކުރުމުގެ މަސައްކަތް ފެށިފައިވާކަމަށް ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ. ވަޒީރު މިހެން ވިދާޅުވީ ދުނިޔޭގެ ފަތުރުވެރިކަމުގެ ދުވަހުގެ މުނާސަބަތުގައި ދެއްވި ޚާއްސަ މެސެޖުގައެވެ.
ވަޒީރު ފައިޞަލް ވިދާޅުވީ ފަތުރުވެރިކަމުގެ ދާއިރާ ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. މިގޮތުން، މި ދާއިރާއިން ތަމްރީންތައް ދިނުމަށްޓަކައި ރާއްޖޭގައި ހޮޓެލް ސްކޫލެއް ތަރައްޤީކުރުމަށް ނިންމާފައިވާ ކަމަށް އެމަނިކުފާނު ވިދާޅުވިއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެއްކަން ވަޒީރު ފާހަގަކުރެއްވިއެވެ.
"އެތަން ޑިވެލޮޕްކުރުމުގެ މަސައްކަތް ރައީސް ބޭނުންފުޅުވަނީ ވަކި ރަށެއްގައި ކުރަން، ޓޫރިޒަމްވެސް އެތަނުގައި ކުރިއަށްދާގޮތަށް ކުރަން، މިނިސްޓްރީއިން މަސައްކަތްކުރަމުން މިދަނީ، ވަރަށް އުއްމީދު ބޮޑު މިކަން ވާނެ ކަމުގެ" ވަޒީރު ފައިޞަލް ވިދާޅުވިއެވެ.
Advertisement
މީގެއިތުރުން، މި މަޝްރޫޢާ ގުޅޭގޮތުން ސްވިޒަރލޭންޑުގެ ހޮޓެލް ސްކޫލަކާއެކު މަޝްވަރާ ކުރެވިފައިވާކަން ވެސް ވަޒީރު ހާމަކުރެއްވިއެވެ. ވަޒީރު ފައިޞަލް އިތުރަށް ވިދާޅުވީ، ރާއްޖޭގެ ފަތުރުވެރިކަމުގެ ދާއިރާގެ މެނޭޖީރިއަލް ފެންވަރުގައި މަސައްކަތްކުރާ ދިވެހިން އިތުރުކުރުމަކީ ސަރުކާރުގެ އަމާޒެއް ކަމަށެވެ. މިކަމުން ދިވެހިންގެ ވަޒީފާގެ ޔަޤީންކަމާއި ހައްޤުތައް ކަށަވަރު ކުރެވޭނެ ކަމަށް އެމަނިކުފާނު ވިދާޅުވިއެވެ.
ފަތުރުވެރިކަމުގެ ދުވަހާ ގުޅިގެން ދެއްވި މެސެޖުގައި، ފަތުރުވެރިކަމުގެ ދާއިރާގެ މުވައްޒަފުންގެ ބޭނުންތައް ދެނެގަނެ، މި ދާއިރާގައި ހުރި މައްސަލަތައް ހައްލުކުރުމަށް ސަރުކާރުން ގިނަ މަސައްކަތްތަކެއް ކުރަމުންދާކަންވެސް ވަޒީރު ފާހަގަކުރެއްވިއެވެ.
