އިންޑިއާއިން އަންނަ އަހަރުގެ އޮސްކާ އެވޯޑްސްގައި ވާދަކުރަން ގެންދާ ފިލްމުގެ ގޮތުގައި "ލާޕަތާ ލޭޑީސް" ހަމަޖައްސައިފި އެވެ. ފިލްމް ފެޑަރޭޝަން އޮފް އިންޑިއާއިން މި ނިންމުން އިއްޔެ އިއުލާންކޮށްފައިވެއެވެ.
ފިލްމް ފެޑަރޭޝަންގެ 13 ޖަޖުންގެ ޕެނަލަކުން ނިންމީ "ލާޕަތާ ލޭޑީސް" އޮސްކާއަށް ހުށަހަޅަށެވެ. މިފަހަރު އިންޑިއާގެ އޮސްކާ ސިލެކްޝަނަށް 22 ފިލްމަކުން ވާދަކުރިއެވެ. އޭގެ ތެރޭގައި 12 ހިންދީ ފިލްމާއި، 6 ތަމަޅަ ފިލްމާއި، 4 މަލަޔާލަމް ފިލްމު ހިމެނެއެވެ.
"ލާޕަތާ ލޭޑީސް" އަކީ އާމިރް ހާންގެ ކުރީގެ އަންހެނުން ކިރަން ރާއޯ ޑައިރެކްޓުކޮށްފައިވާ ފިލްމެކެވެ. މި ފިލްމު ވާދަކުރާނީ އޮސްކާގެ ބެސްޓް ފޮރިން ފިލްމް ކެޓަގަރީންނެވެ. ކިރަންއާ އެކު މި ފިލްމު ޕްރޮޑިއުސްކޮށްފައިވަނީ އާމިރު ހާން އާއި ޖިޔޮތީ ދޭޝްޕާންޑޭ އެވެ.
Advertisement
މި ފިލްމަކީ އަލަތު ކައިވެނި ކޮށްގެން އުޅޭ ދެ އަންހެނަކު، ފިރިމީހާއާ އެކު ގެއަށް ދިއުމުގެ މަގުމަތީގައި އެމީހުންގެ ފިރިން އޮޅޭ ހިސާބުން ހިނގާ ތަފާތު ކަންތައްތަކެއް ދައްކާ އަސަރުގަދަ ފިލްމެކެވެ. މި ވާހަކައަކީ އިންޑިއާގެ ރަށްފުށު ހިސާބަކަށް ނިސްބަތްވާ ފަގީރު ބައެއްގެ ވާހަކައެކެވެ.
ފިލްމުގެ މުހިންމު ރޯލުތައް އަދާކޮށްފައިވަނީ ނިތަންޝީ ގޯއެލް، ޕްރަތީބާ ރަންތާ، ސްޕާޝް ޝްރިވަސްތާވް، ޗަޔާ ކަދަމް އަދި ރަވީ ކިޝަން އެވެ.
ފިލްމީ ދުނިޔޭގައި ދޭ އެންމެ ޝަރަފުވެރި އެވޯޑް ކަމަށްވާ އޮސްކާގެ 97 ވަނަ އެވޯޑް ހަފުލާ އަންނަ އަހަރު ބޭއްވުމަށް ހަމަޖެހިފައިވާއިރު، އޭގެ ތާރީޚު އަދި އިޢުލާންކޮށްފައެއް ނުވެއެވެ.
