އިލެކްޝަންސް ކޮމިޝަނުން (އީސީ) ސިޔާސީ ޕާޓީތަކުގެ ޤަވާއިދަށް މުހިންމު އިސްލާހުތަކެއް ގެނެސްފިއެވެ. މި އިސްލާހުތަކުގެ ދަށުން، ޕާޓީން ވަކިވުމާއި، ނޭނގި ބަދަލުކޮށްފައިވާ ޕާޓީ އަނބުރާ ބަދަލުކުރުމުގެ މަގު ފަސޭހަކޮށްދީފައިވެއެވެ.
އިލެކްޝަންސް ކޮމިޝަނުން ގެނައި އިސްލާހުތަކުގެ ތެރޭގައި، ސިޔާސީ ޕާޓީއަކުން ވަކިވާން އެދި ހުށަހަޅާތާ 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭން ޖެހޭނެކަމަށް ބަޔާންކޮށްފައިވެއެވެ. އަދި މި މުއްދަތުގެ ތެރޭގައި ވަކިނުކޮށްފިނަމަ، އިލެކްޝަންސް ކޮމިޝަނުން ކަނޑައަޅާ ނިޒާމެއްގެ ތެރެއިން ހުށަހެޅުމުން އެ މީހެއްގެ ނަން ޕާޓީގެ ދަފްތަރުން އުނިކޮށްދެވޭނެއެވެ.
މީގެ އިތުރުން، މެންބަރަކަށް ނޭނގި އޭނާގެ ޕާޓީ ބަދަލުކޮށްފައިވާނަމަ، އެކަން އިލެކްޝަންސް ކޮމިޝަނަށް ހުށަހެޅުމުން ކުރިން ހުރި ސިޔާސީ ޕާޓީއަށް އަނބުރާ ބަދަލުކޮށްދެވޭނެއެވެ. އަދި ސިޔާސީ ޕާޓީއެއްގެ މެންބަރުކަމުގައި ހުރެގެން އަދާ ނުކުރެވޭ މަގާމަކަށް ކުރިމަތިލުމުން، އެ މީހަކު ޕާޓީގެ ދަފްތަރުން އުނިކޮށްދެވޭނެއެވެ.
Advertisement
ކުރިން ޤަވާއިދުގައި އޮތް ގޮތުން، ޕާޓީން ވަކިވާން އެދި ހުށަހަޅަންޖެހެނީ ޚާއްސަ ފޯމެއް މެދުވެރިކޮށެވެ. އަދި ވަކިވާން އެދޭ ސަބަބަށް ރިޢާޔަތްކޮށް، އެ މީހަކު ދަފްތަރުން އުނިކުރުމުގެ އިޚްތިޔާރު އިލެކްޝަންސް ކޮމިޝަނަށް ލިބިގެންވިއެވެ. ނަމަވެސް މިހާރުގެ އިސްލާހާ އެކު، މެންބަރަކު ވަކިވާން އެދުމުން ކޮމިޝަނުން އެ މީހަކު ވަކިކޮށްދޭން ޖެހޭނެއެވެ.
މި އިސްލާހުތަކަކީ ރައްޔިތުންގެ ސިޔާސީ ޙައްޤުތައް ހިމާޔަތްކޮށް، ޕާޓީތަކުގެ މެންބަރުކަމާ ގުޅޭ ކަންކަން އިތުރަށް ފަސޭހަކޮށްދިނުމަށް އަމާޒުކޮށްގެން ގެނެވުނު ބަދަލުތަކެކެވެ. މިކަމުގެ ސަބަބުން ސިޔާސީ ޕާޓީތަކުގެ މެންބަރުންނަށް އިތުރު ލުއިފަސޭހަތަކެއް ލިބިގެންދާނެ ކަމަށް ބެލެވެއެވެ.
