އޭޝިއަން ފުޓްބޯޅަ ކޮންފެޑެރޭޝަން (އޭ.އެފް.ސީ) ކަޕް ކޮލިފަޔާރސްގައި ބައިވެރިވުމަށް ރާއްޖޭގެ އަންޑަރ 20 ގައުމީ ޓީމު މިއަދު އިންޑޮނޭޝިއާއަށް ފުރައިފިއެވެ.
ފުޓްބޯޅަ އެސޯސިއޭޝަން އޮފް މޯލްޑިވްސް (އެއެފް.އޭ.އެމް) އިން މަޢުލޫމާތު ދެއްވިގޮތުގައި، ރާއްޖޭގެ ޓީމު ފުރާފައިވަނީ މިއަދު ހަވީރު ވެލާނާ އިންޓަރނޭޝަނަލް އެއަރޕޯޓުންނެވެ. މުބާރާތުގައި ރާއްޖޭގެ ފުރަތަމަ މެޗު ކުޅެން ހަމަޖެހިފައިވަނީ މިމަހުގެ 14 ވަނަ ދުވަހުއެވެ.
ގިރޫޕް ސްޓޭޖުގައި ރާއްޖޭގެ ޓީމު ކުޅެން ޖެހެނީ އިންޑޮނޭޝިއާ، ޔަމަން އަދި ޓިމޯރ ލެސްޓެއާ އެކުގައެވެ. މި މުބާރާތުގެ ގްރޫޕް ސްޓޭޖުން ކުރިއަށްދާ ޓީމުތަކަށް 2024 ވަނަ އަހަރު ބޭއްވުމަށް ހަމަޖެހިފައިވާ އޭ.އެފް.ސީ އަންޑަރ 20 އޭޝިއަން ކަޕްގައި ވާދަކުރުމުގެ ފުރުސަތު ލިބިގެންދާނެއެވެ. އަހުމަދު ޝާކިރު
ރާއްޖޭގެ އަންޑަރ 20 ޓީމުގެ ކޯޗަކީ އަހުމަދު ޝާކިރެވެ. ޓީމުގައި ހިމެނެނީ 23 ކުޅުންތެރިންނެވެ. މީގެ ތެރޭގައި ގިނަ ކުޅުންތެރިންނަކީ ރާއްޖޭގެ ޕްރިމިއަރ ލީގުގައި ކުޅެމުންދާ ޒުވާން ކުޅުންތެރިންނެވެ.
