ތިނަދޫ ޓަރޝަރީ ހޮސްޕިޓަލުގެ މަސައްކަތް މިއަހަރުތެރޭގައި ނުވަތަ އަންނަ އަހަރުގެ ކުރީކޮޅު ފަށާނެ ކަމަށް ސިއްޙަތާ ބެހޭ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ. ވަޒީރު މިހެން ވިދާޅުވީ ޑރ. އަބްދުއްސަމަދު މެމޯރިއަލް ހޮސްޕިޓަލަށް 55 އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ވަޒީރު ވިދާޅުވީ ތިނަދޫ ސިޓީގެ ރައްޔިތުން ބޭނުންވަނީ ޑރ. އަބްދުއްސަމަދު މެމޯރިއަލް ހޮސްޕިޓަލް ޓާޝަރީ ފެންވަރަށް ތަރައްގީކުރަން ކަމަށާއި އެ މަސައްކަތަކީ މުޅި ހުވަދު އަތޮޅުގެ ރައްޔިތުންނަށް ވެސް ފައިދާވާނެ މަސައްކަތެކެވެ. އަދި މި މަޝްރޫޢުގެ މަސައްކަތް މިއަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު ފެށުމަށް މަސައްކަތް ކުރައްވަމުން ގެންދަވާ ކަމަށާއި ޓަރޝަރީ ހޮސްޕިޓަލް އަޅާނީ މިހާރުގެ ހޮސްޕިޓަލް ހުރި ބިމުގައި ކަމަށް ވެސް ވަޒީރު ވިދާޅުވިއެވެ.
ސަރުކާރުގެ ޕްލޭނުގެ ދަށުން އަލަށް އަޅާ އިމާރާތާއެކު އީއާރުގެ ޚިދުމަތް މިހާރަށްވުރެ ރަނގަޅު ފެންވަރުގައި، ޒަމާނީ ޓެކްނޮލޮޖީއާއެކު ފޯރުކޮށްދެވޭނެ ކަމަށާއި، ބައިނަލްއަގުވާމީ ފެންވަރުގެ ޓެކްނޮލޮޖީތަކާއެކު އޮޕަރޭޝަން ތިއޭޓަރުތަކެއް ތަރައްގީ ކުރެވިގެންދާނެ ކަމަށް ވެސް ވަޒީރު ވިދާޅުވިއެވެ. މި މަޝްރޫޢަށް ބޭނުންވާ ފައިސާ ހަމަޖެއްސުމުގެ އެންމެ ފަހުގެ މަސައްކަތްތައް މިހާރު ކުރައްވަމުން ގެންދަވާކަން ވެސް ވަޒީރު ވަނީ ފާހަގަ ކުރައްވާފައެވެ.
Advertisement
މީގެ އިތުރުން، ތިނަދޫގައި ވެލްނެސް ސެންޓަރެއް ހިމެނޭހެން އަރބަން ޕްރައިމަރީ ހެލްތުކެއަރ ސެންޓަރެއް ތަރައްގީ ކުރެވިގެންދާނެ ކަމަށާއި، އަންނަ އަހަރު ތެރޭގައި އެމްއާރުއައިގެ ޚިދުމަތްވެސް ފެށޭނެކަމަށް އުއްމީދު ކުރައްވާ ކަމަށް ވަޒީރު ވިދާޅުވިއެވެ. ނަމަވެސް، ޖާގައިގެ ދަތިކަމާއި ދައުލަތުގެ މާލީ ހާލަތު ދަށްވުމުގެ ސަބަބުން ގޮންޖެހުންތަކެއް ހުރިކަން ވަޒީރު ފާހަގަ ކުރެއްވިއެވެ.
ވަޒީރުގެ މި ދަތުރުފުޅުގައި ޑރ. އަބްދުއްސަމަދު މެމޯރިއަލް ހޮސްޕިޓަލުގައި އަލަށް ގާއިމުކުރި ރިޕްރޮޑަކްޓިވް ހެލްތު ސެންޓަރާއި ބްލަޑް ބޭންކުވެސް ހުޅުއްވައި ދެއްވިއެވެ. އަދި ބޭސް ނުލިބުމުގެ މައްސަލައަށް ވެސް ހައްލު ހޯދައިދެއްވާނެ ކަމުގެ ޔަގީންކަން ވަޒީރު ވަނީ ވަޒީރު ވަނީ ދެއްވާފައެވެ.
މި މަޝްރޫޢުގެ ސަބަބުން ތިނަދޫ ސިޓީއާއި މުޅި ހުވަދު އަތޮޅުގެ ސިއްޙީ ޚިދުމަތްތައް އިތުރަށް ތަރައްޤީވެ، ރައްޔިތުންނަށް ލިބޭ ޚިދުމަތުގެ ފެންވަރު މަތިވެގެންދާނެ ކަމަށް އުއްމީދު ކުރެވެއެވެ. ޚާއްޞަކޮށް ޓަރޝަރީ ފެންވަރުގެ ހޮސްޕިޓަލެއް ގާއިމުވުމުން، ގިނަ ބަލިތަކަށް ފަރުވާ ހޯދުމަށް މާލެއަށް ދަތުރުކުރަން ޖެހޭ މިންވަރު މަދުވެގެންދާނެއެވެ.
