ދުނިޔޭގެ އެންމެ ބާރުގަދަ ޖަމާޢަތް ކަމަށްވާ އދ. ގެ އެންމެ ބާރުގަދަ ގުނަވަން، ސަލާމަތީ މަޖިލީހުގައި ބައެއް ބާރުގަދަ ޤައުމުތަކަށް ލިބިފައިވާ ވީޓޯ ކުރުމުގެ ބާރު ނިމުމަކަށް ގެނެސް، އެ ޖަމާޢަތުގެ މުޅި އޮނިގަނޑު އިޞްލާޙުކުރަން ޖެހިފައިވާ ކަމަށް ރާއްޖެއިން އިއްޔެ އދ. ގައި ގޮވާލައިފިއެވެ. މިގޮތަށް ގޮވައިލީ، ބައިނަލްއަޤްވާމީ ޤާނޫނުތައް ހަމަހަމަ ކަމާއެކު ތަންފީޒް ނުކުރެވުމުގެ ސަބަބުން ކުރިމަތިވެފައިވާ ގިނަ ގޮންޖެހުންތަކާއި، ޚާއްޞަކޮށް ފަލަސްތީނުގެ ޣައްޒާގައި ހިނގަމުންދާ އިންސާނިއްޔަތާއި ޚިލާފު ޢަމަލުތަކަށް ޙައްލެއް ނުލިބުމުގެ ކަންބޮޑުވުން ފާޅުކުރަމުންނެވެ.
ނިމިދިޔަ ކުދި ޖަޒީރާ ޤައުމުތަކުގެ ނުވަތަ (ސިޑްސް)ގެ ބައްދަލުވުންތަކުގައި ވެސް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތަކުރާރުކޮށް، މި ދެންނެވި ވީޓޯ ކުރުމުގެ ބާރު އުވައިލުމަށް ވަކާލާތުކުރައްވިކަން ފާހަގަ ކުރެވެއެވެ.
އދ. ގެ ޢާންމު މަޖިލީހުގެ މިހާރު ކުރިއަށްދާ ބައްދަލުވުމުގައި ދިވެހިރާއްޖޭގެ ފަރާތުން ވާހަކަ ދައްކަވަމުން ފޮރިން މިނިސްޓަރު ޚަލީލް ވިދާޅުވީ، ޤައުމުތަކުގެ މެދުގައި ހަމަހަމަކަމާއެކު ބައިނަލްއަޤްވާމީ ޤާނޫނުތައް ނުހިނގާތީ އެކަމުގެ ކަންބޮޑުވުން އިންތިހާއަށް އޮތް ކަމަށެވެ. އެގޮތުން އިޒްރޭލުން ޣައްޒާގައި ހިންގަމުންދާ ޤާތުލުޢާންމަކީ މިފަދަ ޙާލަތެއްގެ ސާފު މިސާލެއް ކަމަށް މިނިސްޓަރު ފާހަގަކުރެއްވި އެވެ.
ޚަލީލް ވިދާޅުވީ އިޒްރޭލުގެ ޖަރީމާތައް ހުއްޓުވަން ނުކުޅެދުމުގެ ސަބަބުން އެ އަނިޔާވެރިކަން ޤަޠަރާއި ސީރިއާ އާއި ޖޯޑަނާއި ޔަމަނު އަދި އީރާނާއި ހަމައަށް ވެސް ފޯރާފައިވާ ކަމަށެވެ. އެހެންކަމުން މިއީ އެއްވެސް ޤައުމެއްގެ ބޯޑަރަށް ސަލާމަތެއް ނެތްކަމް ދައްކުވައިދޭ ކަމެއް ކަމަށް ވެސް ވިދާޅުވި އެވެ،
މިކަމަށް ޙައްލެއް ހޯދުމަށް އދ. ގެ އޮނިގަނޑު އިޞްލާޙްކޮށް، ހަމަހަމަކަމާއި އިންޞާފު ޤާއިމުކުރުން އަވަސްކުރުމަށް މިނިސްޓަރު ވަނީ ގޮވާލައްވައިފައެވެ. އަދި އެންމެ މުހިންމު ކަމަކީ، ވީޓޯ ކުރުމުގެ ބާރަށް ނުސިހޭ ސަލާމަތީ މަޖިލީހެއް އެކުލަވައިލުން ކަމަށް ވެސް އޭނާ ފާހަގަކުރެއްވި އެވެ. މިފަދަ އިޞްލާޙްތަކުގެ މައިގަނޑު ބޭނުމަކީ، އދ. އަށް ލިބިފައިވާ އިތުބާރުގެ އިތުރުން ބައިނަލްއަޤްވާމީ ނިޒާމަށް އޮތް އިތުބާރު އަލުން އިޢާދަކުރުން ކަމަށް މިނިސްޓަރު ވިދާޅުވި އެވެ.
ސަލާމަތީ މަޖިލީހުގެ ނިންމުންތައް އެ މަޖިލީހުގެ ދާއިމީ ފަސް މެންބަރުން ކަމަށްވާ އެމެރިކާ، ރަޝިޔާ، އިނގިރޭސި ވިލާތް، ފްރާންސް އަދި ޗައިނާ އިން ކުރެ ކޮންމެ ޤާއުމަކުން ވެސް ބޭނުންވެއްޖެ ނަމަ ވީޓޯކޮށް ބާތިލްކޮށްލުމުގެ ބާރު އޮންނާތީ، އެކަމާއި ގުޅޭ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރު އދ. ގެ ސަލާމަތީ މަޖިލީހުގެ ބައްދަލުވުމެއްގައި ބައިވެރިވެވަޑައިގެން ވިދާޅުވީ، ދުނިޔޭގެ ނިޒާމުގެ ތެރޭގައި އިތުބާރު ގެއްލި ޝައްކުތައް ގިނަވަމުންދާ އެންމެ ބޮޑު އެއް ސަބަބަކީ ސަލާމަތީ މަޖިލީހުގެ ނާގާބިލްކަމެވެ.
