މެދުއިރުމަތީގައި މިހާރު ހިނގަމުންދާ ހަނގުރާމައާއި ގުޅިގެން ތެޔޮ ލިބުމަށް ކުރިމަތިވެދާނެ ދަތިތަކަށް ހައްލު ހޯދުމުގެ ގޮތުން، ރާއްޖެއަށް ތެޔޮ އިމްޕޯޓު ކުރާނެ އިތުރު މާކެޓުތައް ހޯދުމުގެ މަސައްކަތް ސަރުކާރުން ފަށައިފި އެވެ.

މިކަން ހާމަކުރެއްވީ، މެދުއިރުމަތީގެ ހަމަނުޖެހުންތަކާ ގުޅިގެން ދިވެހި ރައްޔިތުންނަށް ކުރިމަތިވެދާނެ ދަތިތައް ހައްލުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފައްދަވާފައިވާ ވަޒީރުންގެ ހާއްސަ ކޮމިޓީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފޮރިން މިނިސްޓަރު ޑރ. ޢަބްދުﷲ ހަލީލެވެ.

މިނިސްޓަރު ވިދާޅުވީ، ރާއްޖެއަކީ އިމްޕޯޓަށް ބަރޯސާވެފައިވާ ކުދި ޖަޒީރާ ގައުމަކަށް ވުމާއެކު، މެދުއިރުމައްޗާއި ގަލްފުގެ ޤައުމުތަކުގައި ހިނގަމުންދާ ހަމަލާތަކުގެ ސަބަބުން ރާއްޖޭގެ އިގްތިސާދަށާއި ސަލާމަތަށް ކުރިމަތިވެދާނެ ނޭދެވޭ އަސަރުތައް އެ ކޮމިޓީން ވަރަށް ގާތުން ބަލަމުންދާ ކަމަށެވެ. އަދި ގައުމުގެ މަސްލަހަތު ހިމާޔަތްކުރުމަށްޓަކައި ހަރުދަނާ ނިޒާމެއްގެ ދަށުން އަޅަންޖެހޭ ފިޔަވަޅުތައް އެޅުމުގެ މަސައްކަތް ކުރަމުންދާކަންވެސް މިނިސްޓަރު ފާހަގަކުރެއްވި އެވެ.

ރާއްޖެއަށް އާންމުކޮށް ތެޔޮ އެތެރެކުރަނީ މެދުއިރުމަތީގެ ސަރަހައްދުތަކުން ކަމަށްވީ ނަމަވެސް، އެ ސަރަހައްދުގެ މަގުތައް ބަންދުވުމުގެ ބިރު އޮތުމާއެކު، އަވަށްޓެރި ގައުމުތަކާއި އެހެނިހެން މާކެޓުތަކުން ތެޔޮ ހޯދުމުގެ މަސައްކަތް މިހާރު ދަނީ ކުރެވެމުންނެވެ.

"ތެލުގެ ރައްކާތެރިކަން ކަށަވަރުކުރުމުގެ ގޮތުން އެކި ގޮތްގޮތުން އެކި ގައުމުތަކާއެކު މަސައްކަތް އެބަކުރެވޭ. މިއީ ވަކި ގައުމަކަށް ނުވަތަ މަދު ގައުމަކަށް ބަރޯސާވުމުގެ ބަދަލުގައި ތެޔޮ ހޯދުން ޑައިވާސިފައިކުރުމަށް (ސިންދަފާތުކުރުމަށް) ކުރެވޭ މަސައްކަތެއް،" މިނިސްޓާރު ވިދާޅުވި އެވެ.

މީގެ އިތުރުން، ދުނިޔޭގެ ބާޒާރުގައި ތެލުގެ އަގު %25 އާއި %30 އާ ދެމެދުގެ މިންވަރަކަށް އުފުލިފައިވީ ނަމަވެސް، ސަރުކާރުން ފިޔަވަޅުތައް އަޅާނީ ބާޒާރަށް އަންނަ ބަދަލުތަކަށް ރިއާޔަތްކުރުމަށްފަހު ކަމަށް މިނިސްޓަރު ވިދާޅުވި އެވެ. ހަމައެހެންމެ، ރާއްޖެއަށް ބޭނުންވާ ކާބޯތަކެތި އެއްވެސް ދަތިކަމެއް ނެތި ލިބޭނެ އިންތިޒާމުތައްވެސް ސަރުކާރުން ދަނީ ހަރުދަނާކުރަމުންނެވެ.

އިތުރުވަމުންދާ އާބާދީއަށާއި ފަތުރުވެރިންނަށް ބޭނުންވާ ތެލާއި ކާބޯތަކެތީގެ ރައްކާތެރިކަން ކަށަވަރުކުރުމުގެ ގޮތުން، ތެޔޮ ރައްކާކުރާނެ ކެޕޭސިޓީ އިތުރުކުރުމުގެ މަސައްކަތްވެސް ސަރުކާރުން މިހާރު ވަނީ ފަށާފަ އެވެ.