މަސްވެރިކަމާ ގުޅުންހުރި ދެމެހެއްޓެނިވި މަސައްކަތްތަކަށް މާލީ އެހީ ހޯދުމަށް މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން ވޯލްޑް ބޭންކާއެކު މަޝްވަރާތަކެއް ފަށައިފިއެވެ.

މިކަމާ ގުޅޭގޮތުން ޕްލޭނެއް އެކުލަވާލުމަށް މިއަހަރުގެ ނޮވެމްބަރުމަހުގެ ތެރޭގައި ވޯލްޑް ބޭންކުގެ ޓީމެއް ރާއްޖެ އަންނާނެކަމަށް އެ ވުޒާރާއިން މަޢުލޫމާތު ދީފައިވެއެވެ.

މަސްވެރިކަމުގެ ދާއިރާ ތަރައްޤީކުރުމަށް ވޯލްޑް ބޭންކުން އެހީތެރިކަން ފޯރުކޮށްދޭނެ ދާއިރާތަކާ ބެހޭގޮތުން މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވަނީ ވޯލްޑް ބޭންކުގެ އިރުމަތީ އޭޝިޔާ އަދި ޕެސިފިކް ސަރަޙައްދުގެ ތިމާވެށި، ގުދުރަތީ ވަސީލަތްތައް އަދި ނޫ އިޤްތިޞާދުގެ ޕްރެކްޓިސް މެނޭޖަރ މިސް އޭން ޖީނެޓް ގްލޯބަރއާ މަޝްވަރާކުރައްވާފައެވެ.

މި ބައްދަލުވުމުގައި ވަޒީރު ޝިޔާމް ވަނީ ވޯލްޑް ބޭންކުން ފަންޑުކޮށްގެން އެ ވުޒާރާއިން ކުރިއަށްގެންދާ ޓްރާންސްފޯމް ޕްރޮޖެކްޓުގެ މަސައްކަތްތަކަށް އަލިއަޅުއްވާލައްވާފައެވެ.

ވަޒީރު ޝިޔާމް ވިދާޅުވެފައިވަނީ މިފްކޯއަށް ގަންނަ މަހުގެ 65 އިންސައްތައަކީ ރާއްޖެއިން އެކްސްޕޯޓް ކުރާ ރޯ މަސްކަމަށާއި، ސަރުކާރުގެ އަމާޒަކީ މަސް ޕްރޮސެސްކޮށް މި ޢަދަދު މަދުކުރުން ކަމަށެވެ. އަދި ރާއްޖޭގެ 3 ސަރަޙައްދެއްގައި މަސް ޕްރޮސެސްކުރާ ފެސިލިޓީތައް ޤާއިމުކުރުމަށް މިހާރު ވަނީ މަސައްކަތް ފަށާފައިކަމަށްވެސް ވަޒީރު ވިދާޅުވިއެވެ.

މީގެއިތުރުން، ކުންފުނިތަކުގައި ބޭނުންކުރާ ތެލުގެ 35 އިންސައްތަ ޚަރަދު އިއާދަކުރަނިވި ހަކަތައަށް ބަދަލުކުރުމަކީ ރައީސް ޑރ. މުޙައްމަދު މުޢިއްޒުގެ ސިޔާސަތެއްކަމަށްވެސް ވަޒީރު ފާހަގަކުރެއްވިއެވެ.

ވޯލްޑް ބޭންކްއިން ތިމާވެށީގެ ދާއިރާއިންނާއި، އަންހެނުން ބާރުވެރިކުރުވުމާއި އަދި އެހެނިހެން ދާއިރާތަކުން ކުރާ މަސްވެރިކަމާ ގުޅުންހުރި ދެމެހެއްޓެނިވި މަސައްކަތްތަކަށް ފައިނޭންސް ލިބޭނެ ގޮތްތައް އެބަހުރިކަމަށް އެ ވުޒާރާއިން ފާހަގަކޮށްފައިވެއެވެ.

މީގެއިތުރުން، އިންޓަނޭޝަނަލް ފަންޑް ފޮރ އެގްރިކަލްޗަރ ޑިވެލޮޕްމަންޓް (އިފާޑު) އާއެކުވެސް ބައްދަލުވުމެއް ބާއްވާފައިވާކަމަށް އެ ވުޒާރާއިން ބުނެފައިވެއެވެ. މި ބައްދަލުވުމުގައި ދިވެހިރާއްޖޭގެ މަސްވެރި ސިނާއަތް ތަރައްޤީކުރުމަށް އިފާޑުގެ އެހީތެރިކަން ބޭނުންވާ ދާއިރާތަކާ ގުޅޭގޮތުން ވަނީ މަޝްވަރާކޮށްފައެވެ.

ވަޒީރު ޝިޔާމް ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސްވެރިކަން ތަރައްޤީކުރުމަށް ކުރައްވާ މަސައްކަތްޕުޅުގެ ތެރެއިން މެރިކަލްޗަރ ދާއިރާ ތަރައްޤީކުރުމަށް ގެންގުޅުއްވާ ވިސްނުންފުޅު ހިއްސާކުރައްވައި، މެރިކަލްޗަރ ތަރައްޤީކުރުމަށް އެ ވުޒާރާއިން ކުރަމުންދާ މަސައްކަތްތައްްވެސް އިފާޑުގެ ފަރާތްތަކާ ހިއްސާކުރައްވާފައެވެ.

އަދި މެދުފަންތީގެ ވިޔަފާރިތަކުގެ ތެރެއިން މަސް ޕްރޮސެސްކުރުމުގައި އަންހެނުންގެ ދައުރު ފާހަގަކުރައްވައި، އެ ފަރާތްތަކަށް އެހީ ބޭނުންވާ ދާއިރާތައް އެ ވުޒާރާއިން ވަނީ އިފާޑުގެ ފަރާތްތަކާ ހިއްސާކުރައްވާފައެވެ.

މި މަޝްވަރާތަކަކީ ދިވެހިރާއްޖޭގެ މަސްވެރިކަމުގެ ދާއިރާ ތަރައްޤީކުރުމަށާއި، މަސްވެރިކަމާ ގުޅުންހުރި ދެމެހެއްޓެނިވި މަސައްކަތްތަކަށް މާލީ އެހީތެރިކަން ހޯދުމަށް އެޅޭ މުހިންމު ފިޔަވަޅުތަކެއް ކަމަށް ބެލެވެއެވެ. ޚާއްޞަކޮށް ވޯލްޑް ބޭންކުގެ ޓީމެއް މިއަހަރުގެ ނޮވެމްބަރު މަހު ރާއްޖެ އައުމަށް ހަމަޖެހިފައިވުމަކީ މި މަސައްކަތްތައް އިިތުރަށް ކުރިއަށް ގެންދިއުމަށް ލިބޭނެ ފުރުޞަތެއްކަމަށް ފާހަގަކުރެވެއެވެ.

މި މަސައްކަތްތަކުގެ ސަބަބުން ދިވެހިރާއްޖޭގެ މަސްވެރިކަމުގެ ދާއިރާއަށް އައު ކުރިއެރުންތަކެއް ލިބި، މަސްވެރިންނާއި މަސްވެރިކަމާ ގުޅުންހުރި އެހެނިހެން ފަރާތްތަކަށް އިތުރު ފައިދާތަކެއް ލިބިގެންދާނެކަމަށް އުންމީދު ކުރެވެއެވެ.