އދ. ގެ ސަލާމަތީ މަޖިލީހާއި ބައިނަލްއަގުވާމީ މާލީ އިދާރާތައް ކަމަށްވާ ވޯލްޑް ބޭންކް ފަދަ ތަންތަން އަދިވެސް ހިންގަނީ ދެވަނަ ބޮޑުހަނގުރާމައިގެ ދުވަސްވަރުގެ ބާރުގެ އޮނިގަނޑަށް ފެތޭގޮތަށް ކަމަށް، ނިއުޔޯކުގައި މިހާރު ކުރިޔަށްދާ އދ. ގެ އާންމު މަޖިލީހުގެ ޖަލްސާގައި އެ ޖަމިއްޔާގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ވިދާޅުވެއްޖެއެވެ.
އެންޓޯނިއޯ ގުޓެރޭޒް ސިފަކުރެއްވި ގޮތުގައި، މިއީ މިއަދުގެ ދުނިޔޭގެ ޙަޤީޤީ މަސްރަޙާ އެއްވެސް ވަރަކަށް ނުގުޅޭ، މާޒީވެގޮސްފައިވާ ނިޒާމެކެވެ.
ގުޓެރޭޒް ފާހަގަކުރެއްވި ގޮތުގައި، ދުނިޔޭގެ ބޮޑު އާބާދީއެއް ހިމެނޭ އެފްރިކާ ބައްރަށް ސަލާމަތީ މަޖިލީހުގެ ދާއިމީ ގޮނޑިއެއް ނެތުމަކީ މިއަދު ބަލައިގަނެވޭނެ ކަމެއް ނޫނެވެ. ދުނިޔޭގެ މާލީ ނިޒާމުތައްވެސް ބައްޓަންކޮށްފައި ވަނީ ފަގީރު ގައުމުތަކަށް ބޭއިންސާފުވާ ގޮތަށް، ހަމައެކަނި މުއްސަނދި ގައުމުތަކުގެ މަސްލަހަތު ހިފެހެއްޓުމަށް ކަމަށް ވިދާޅުވިއެވެ. އެހެންކަމުން، މިއަދުގެ ދުނިޔޭގެ ޙަޤީޤަތްތައް ދައްކުވައިދޭނެ ފަދަ ބޮޑެތި އިޞްލާޙުތަކެއް މި މުއައްސަސާތަކަށް ގެންނަން މަޖުބޫރުވެފައިވާ ކަމަށް ވިދާޅުވިއެވެ.
Advertisement
ދުނިޔޭގެ ހަމަޖެހުމާއި އިންސާފު ގާއިމުކުރެވޭނީ މި ބަދަލުތައް ގެނެސްގެން ކަމަށް ވިދާޅުވެ، މުއައްސަސާތައް ޒަމާނާ އެއްގޮތަށް ބަދަލުކުރުމަށް ގައުމުތަކަށް ގޮވައިލެއްވިއެވެ.
