އެސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ވިޓޯލްއާ ގުޅިގެން ފަށާފައިވާ ބައިނަލްއަގުވާމީ ބަންކަރިންގ ޚިދުމަތުގައި އަމާޒުކުރަނީ ރާއްޖޭގެ ސަރަހައްދުން ދަތުރުކުރާ ލަގްޒަރީ އަދި ބޮޑެތި ފައިދާ ލިބޭނެ އުޅަނދުތަކަށް ޚިދުމަތް ދިނުމަށްކަމަށް އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހިމް ވިދާޅުވެއްޖެއެވެ.
ޝިމާދު މިހެން ވިދާޅުވީ މިއަދު ހއ. ހޯރަފުށީގައި ބޭއްވުނު، އުތުރުގައި ބައިނަލްއަގުވާމީ ބަންކަރިންގ ޚިދުމަތް ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.
"ވިޓޯލްއާއި އެސްޓީއޯއާ ގުޅިގެން އަޅުގަނޑުމެން ބޭނުންވަނީ ރާއްޖެ ސަރަހައްދުން މިދާ ލަގްޒަރީ ވެސަލްތަކަށާއި ނީޝް މާކެޓް، މާނައަކީ އަޅުގަނޑުމެންނަށް ބޮޑެތި ފައިދާ ލިބޭނެ ވެސަލްތަކަށް ޓާގެޓްކޮށް އެ ވެސަލްތަކަށް ސާވިސް ދިނުން. ހަމަ މިހެންދާ ކޮންމެ ބޯޓަކަށް ސާވިސް ދިނުމެއް ނޫން،" ޝިމާދު ވިދާޅުވިއެވެ.
މި ޚިދުމަތް ފެށިފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅުގައިވާ ރާއްޖޭގެ އިގްތިސާދު ސިންދަފާތު ކުރެއްވުމުގެ މަސައްކަތްޕުޅުގެ ދަށުންކަމަށް ޝިމާދު ފާހަގަކުރެއްވިއެވެ. އަދި މި ދާއިރާގައި ގިނަ އަހަރުތަކެއްގެ ތަޖުރިބާ ހުރި ވިޓޯލް ކުންފުންޏާއެކު ހަ މަސް ދުވަހުގެ ތެރޭގައި މި ޚިދުމަތް ފެށިފައިވާކަމަށާއި، ފުރަތަމަ ފޯރުކޮށްދެނީ ޑީސަލާއި ލޯ ސަލްފާ ފިޔުލްކަމަށްވެސް އޭނާ ވިދާޅުވިއެވެ.
ބައިނަލްއަގުވާމީ ބަންކަރިންގެ ޚިދުމަތް ފެށުމަށް ބޭއްވި ރަސްމިއްޔާތުގައި ޝިމާދު ވާހަކަ ދައްކަވަނީ / ފޮޓޯ: ޚުލާސާ
ޝިމާދު އިތުރަށް ވިދާޅުވި ގޮތުގައި، ވިޓޯލުން މި ޚިދުމަތް މާކެޓްކެޓް ކުރަން ފެށުމާއެކު ގިނަ ފަރާތްތަކުން ޚިދުމަތަށް އެދެމުންދެއެވެ. އެހެންނަމަވެސް، އެސްޓީއޯގެ އަމާޒަކީ ހަމައެކަނި ފައިދާ ބޮޑު އުޅަނދުތަކަށް ޚިދުމަތް ދިނުމެވެ.
މުސްތަގުބަލުގައި މި ޚިދުމަތް ތަރައްގީކުރުމަށް ބިން ހިއްކައި، ރަނގަޅު ފިޔުލް ފާމްތަކަކާއި ޒަމާނީ ފެންވަރުގެ ޕޯޓެއް ގާއިމްކުރާނެކަމަށްވެސް ޝިމާދު ހާމަކުރެއްވިއެވެ. މީގެ އިތުރުން، ރާއްޖޭގެ އިގްތިސާދު އިތުރަށް ސިންދަފާތު ކުރުމުގެ ގޮތުން އަންނަ އަހަރު ޗައިނާގެ ލޯނު އެހީގެ ދަށުން "އެގްރިކަލްޗަރ އިކޮނޮމިކް ޒޯން" ގެ ނަމުގައި މަޝްރޫޢެއް ކުރިއަށް ގެންދިއުމަށް ރޭވިފައިވާކަމަށްވެސް އޭނާ ހާމަކުރިއެވެ.
ބައިނަލްއަގުވާމީ ބަންކަރިންގ ޚިދުމަތް ފެށުމާއެކު، ރާއްޖޭގެ އުތުރު ސަރަހައްދުގައި އިތުރު ވަޒީފާގެ ފުރުސަތުތައް އުފެދި، އެ ސަރަހައްދުގެ އިގްތިސާްތިސާދަށް ފައިދާވާނެކަމަށް އުއްމީދު ކުރެވޭކަމަށާއި އަދި މި ޚިދުމަތުގެ ސަބަބުން ރާއްޖޭގެ ކަނޑުގެ ސަރަހައްދުގައި ދަތުރުކުރާ ބޮޑެތި އުޅަނދުފަހަރަށް ފަސޭހަކަމާއެކު ތެޔޮ ލިބި، ރާއްޖޭގެ ބަނދަރުތަކަށް އިތުރު އާމްދަނީ ލިބޭނެކަމަށްވެސް ޝިމާދު ވިދާޅުވިއެވެ.
މި ޚިދުމޚިދުމަތް ފެށުމަކީ ރާއްޖޭގެ އިގްތިސާދު ސިންދަފާތުކޮށް، ބޭރުގެ އިންވެސްޓްމަންޓްތައް ރާއްޖެއަށް ގެނައުމަށް އެޅޭ މުހިންމު ފިޔަވަޅެއްކަމަށް އިގްތިސާދީ މާހިރުން ދެކެއެވެ. އަދި މި ޚިދުމަތުގެ ސަބަބުން ރާއްޖެއަށް ބޭރު ފައިސާ ވަނުމުގެ އިތުރުން، ރާއްޖޭގެ ބަނދަރުތަކުގެ ޚިދުމަތްތައް ތަރައްގީވެ، ބައިނަލްއަގުވާމީ ފެންވަރުގައި ރާއްޖޭގެ ނަން މަޝްހޫރުވާނެކަމަށް ވެސް އެބޭފުޅުން ލަފާކުރެވެއެވެ.
