ރާއްޖޭގެ އިގްތިސާދީ ހާލަތާ މެދު ރައްޔިތުންގެ ހިތުގައި ބިރުވެރިކަން އުފައްދައި، އިންވެސްޓަރުންގެ ހިތުގައި ސުވާލު އުފެދޭ ގޮތަށް ވާހަކަ ދެއްކުމުގެ ޖާގަ ދެވެން ނެތް ކަމަށް އިޤްތިޞާދީ ވަޒީރު މުހައްމަދު ސައީދު ވިދާޅުވެއްޖެއެވެ.

މިނިސްޓަރ ސައީދު މި ވާހަކަ ދެއްކެވީ އިހަވަންދިއްޕޮޅުގައި ބައިނަލްއަޤްވާމީ ބަންކަރިންގެ ޚިދުމަތް ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.

މިނިސްޓަރ ސައީދު ވިދާޅުވި ގޮތުގައި މިއީ ވެރިކަމަށް އައިސް ކުއްލިއަކަށް ރައީސް ޑރ. މުޙައްމަދު މުޢިއްޒު ނިންމެވި ނިންމުމެއް ނޫންކަމަށާއި ރިޔާސީ އިންތިޚާބަށް އެކުލަވާލި މެނިފެސްޓޯގައި ވެސް ރާއްޖޭގެ އިޤްތިޞާދާ ގުޅުން ހުރި ގިނަ ޕްލޭންތައް ހިމެނިފައިވާ ކަމަށް ފާހަގަކުރެއްވިއެވެ.

^{ބައިނަލްއަޤްވާމީ ބަންކަރިންގެ ޚިދުމަތް ފެށުމުގެ ރަސްމިއްޔާތުގައި ވަޒީރު ސައީދު ވާހަކަ ދައްކަވަނީ / ފޮޓޯ: ޚުލާސާ}

ސައީދު ވިދާޅުވި ގޮތުގައި ކުރީގެ ސަރުކާރުތަކުން އިޤްތިޞާދު ކުރިއެރުވުމަށް ގިނަ ފިޔަވަޅުތަކެއް ޢިއުލާން ކުރި ނަމަވެސް، އޭގެ ގިނަ ކަންކަން ތަންފީޒީ މަރުހަލާއަށް ގޮސްފައި ނުވެއެވެ. އެހެންކަމުން ރައީސް މުޢިއްޒުގެ އެންމެ ބޮޑު އަމާޒަކަށްވީ މިފަދަ މުހިންމު ކަންކަން ބަލައި ތަންފީޒު ކުރުން ކަމަށް އޭނާ ވިދާޅުވިއެވެ.

އިންޓަނޭޝަނަލް ބަންކަރިންގެ ޚިދުމަތް ފެށިގެން ދިޔައީ ދުނިޔޭގެ މަޝްހޫރު އެއް ކުންފުންޏާ އެކުގައި ކަމަށާއި، މިއީ 55 އަހަރުގެ ތަޖުރިބާ ލިބިފައިވާ ކުންފުންޏެއް ކަމަށް ސައީދު ފާހަގަކުރެއްވިއެވެ. އެހެންނަމަވެސް، މި މަސައްކަތް ފެށުމާމެދު ސަރުކާރާ މެދު ސުވާލު އުފެއްދި އެތައް ބަޔަކު ތިބިކަން އޭނާ ފާހަގަކުރެއްވިއެވެ.

މިނިސްޓަރ ސައީދު އިތުރަށް ވިދާޅުވީ ބައެއް މީހުންގެ އަމާޒަކީ ރައީސްގެ މަސައްކަތް ކާމިޔާބުވިޔަ ނުދިނުން ކަމަށެވެ. އެއީ ޤައުމިއްޔަތާ ދެކޮޅު ވިސްނުމެއް ކަމަށާއި، އަދި ޤައުމާ ދެކޮޅަށް ކުރެވޭ މަސައްކަތެއް ކަމަށް އޭނާ ވިދާޅުވިއެވެ.

ރާއްޖޭގެ ބޮޑު ދަރަންޏެއް އުފައްދައި، އިންވެސްޓަރުންނާ މެދު ސުވާލު އުފެއްދުމަށް ޖާގަ ނުދެވޭނެ ކަމަށް ސައީދު ވަނީ ވިދާޅުވެފައެވެ.