ބޮލީވުޑްގެ މަޝްހޫރު ތަރި އާލިއާ ބަޓް ވަނީ އޭނާގެ ނަމަށް ފިރިމީހާ ރަންބީރް ކަޕޫރްގެ އާއިލީ ނަން ކަމަށްވާ "ކަޕޫރް" އިތުރުކޮށްފައެވެ. މި ކަން އޭނާ ހާމަކުރީ ނެޓްފްލިކްސްގެ މަޝްހޫރު ޝޯ "ދަ ގްރޭޓް އިންޑިއަން ކަޕިލް ޝަރުމާ" ގެ ދެވަނަ ސީޒަންގެ އެޕިސޯޑެއްގައެވެ.
އާ ސީޒަންީޒަންގެ ޓީޒާއެއް މިހާރު ވަނީ އާންމުކޮށްފައެވެ. މި ޓީޒާގައި އާލިއާ ބަޓް ކިޔާފައި އޭނާއާ މުހާތަބުކުރުމުން، އޭނާގެ ނަމަކީ އާލިއާ ބަޓް ކަޕޫރް ކަމަށް އޭނާ ވަނީ ބުނެފައެވެ. މި ކަމުން ފޭނުންނަށް ވަނީ ހައިރާންކަމެއް ލިބިފައެވެ. އެއީ، ރަންބީރް ކަޕޫރްއާ ކައިވެނިކުރި ފަހުން އޭނާގެ ނަމަށް ރަންބީރުގެ އާއިލީ ނަން އިތުރުކުރި ކަމަށް އާލިއާ މީގެ ކުރިން އެއްވެސް އިރަކު ބުނެފައި ނުވާތީއެވެ.
އާލިއާ އާއި ރަންބީރްގެ ކައިވެންޏަށް މިހާރު ވަނީ ދެ އަހަރު ފުރިފައެވެ. އަދި އެ ދެމަފިރިންނަށް ވަނީ ކުއްޖަކު ވެސް ލިބިފައެވެ. ނަމަވެސް، މި މުއްދަތުގެ ތެރޭގައި އާލިއާ ވަނީ ސޯޝަލް މީޑިއާގައި ވެސް "ކަޕޫރް" ނަން އިތުރުކޮށްގެން ބޭނުން ކޮށްފައިނުވެއެވެ.
Advertisement
"ދަ ގްރޭޓް އިންޑިއަން ކަޕިލް ޝަރުމާ" ގެ ޝޯގެ ދެވަނަ ސީޒަންގެ އެޕިސޯޑަކަށް އާލިއާ އަންނަނީ އޭނާގެ ކުރިއަށް އޮތް ފިލްމު "ޖިގްރާ" ގެ ޕްރޮމޯޝަނަށެވެ. މި ފިލްމުގައި އާލިއާއާއެކު ލީޑު ރޯލު ކުޅޭ ވެދަންގް ރައިނާ އާއި ކޯ-ޕްރޮޑިއުސަރު ކަރަން ޖޯހަރު ވެސް ކަޕިލް ޝޯއަށް މެހުމާނުންގެ ގޮތުގައި ދެއެވެ. އާލިއާ ޕްރޮޑިއުސްކުރާ ފުރަތަމަ ފިލްމު ވެސް ކަމަށްވާ "ޖިގްރާ" ޕްރިމިއަރ ކުރަނީ އަންނަ މަހުގެ 19 ވަނަ ދުވަހުއެވެ.
ބޮލީވުޑްގެ ވަރަށް މަދު އަންހެން ތަރިއެއް ނޫނީ ކައިވެންޏަށް ފަހު ފިރިމީހާގެ އާއިލީ ނަން ނަމަށް އިތުރެއް ނުކުރެއެވެ. ފިރިމީހާގެ އާއިލީ ނަން ބޭނުންކުރާ މަޝްހޫރު ތަރިންގެ ތެރޭގައި ޕްރިޔަންކާ ޗޯޕްރާ ޖޯނަސް އާއި ކަރީނާ ކަޕޫރް ހާން އަދި އައިޝްވާރިޔާ ރާއީ ބައްޗަން ހިމެނެއެވެ. މިހާރު އާލިއާ ބަޓް ކަޕޫރް ވެސް މި ލިސްޓަށް އިތުރުވެއްޖެއެވެ.
