އިސްލާމިކް މިނިސްޓްރީގެ ޒަކާތު ފަންޑުން ފަގީރު ހާލުގައިވާ ތެލެސީމިއާ ކުދިންނަށް ޚަރަދުކުރުމަށް 10 މިލިއަން ރުފިޔާ ހެލްތު މިނިސްޓްރީއަށް ދީފިއެވެ.

މިކަން އިއުލާނު ކުރެއްވީ މިއަދު ބޭއްވި ނޫސްވެރިންގެ ބައްދަލުވުމެއްގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.

ފަގީރުންގެ ތެރޭގައި ބޯންމެރޯ ހެދުމަށް ބޭނުންޖެހިފައިވާ އެކިއެކި ފަރާތްތައް ތިބި އިރު، ލޭ އަޅާ ކުދިންގެ މައިބަފައިން ދަތިހާލުގައި އުޅޭ ކަމަށްވެސް މިނިސްޓަރ ފާހަގަކުރެއްވިއެވެ.

"ޒަކާތު ފަންޑަކީ ހަމައެކަނި ކޭޝް ފައިސާ ބަހަން ބޭނުންކުރާ އެއްޗަކަށްވުރެ ބޮޑަށް ފަގީރު މީހާއަށް ދިމާވާ ދަތިތަކަށް ޙައްްލު ހޯދާ އޭނާއަށް އުފާވެރިކަން ގެނެސްދިނުމަކީ ވެސް ފަންޑުގެ މަޤްސަދެއް." މިނިސްޓަރ ވިދާޅުވިއެވެ. އެގޮތުން މި އަހަރު ފަގީރު ހާލަތުގައިވާ ތެލެސީމިއާ ކުދިންނަށް ޚަރަދުކުރުމަށް ހެލްތު މިނިސްޓްރީއަށް 10 މިލިއަން ރުފިޔާ ޙަވާލުކޮށްފައިވާ ކަމަށް މިނިސްޓަރ ވިދާޅުވިއެވެ.

މީގެ އިތުރުން، ފަލަސްތީނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ޒަކާތު ކާތު ހައުސްގެ ފަރާތުން އެއް ލައްކަ ޑޮލަރު ހަދިޔާ ކުރުމުގެ މަސައްކަތް ވެސް ކުރަމުންދާ ކަމަށް މިނިސްޓަރު ހާމަކުރެއްވިއެވެ. މި މަސައްކަތް ކުރިއަށް ގެންދަނީ ގަތަރުގެ ރެޑް ކްރޮސެންޓާއިއެކު އެއްބަސްވުމެއް އެކުލަވާލައިގެން އޭޖީ އޮފީހުގެ ލަފަޔާއެކުގައެވެ.

ޒަކާތު ފަންޑުން ވަރަށް ގިނަ ފަރާތްތަކުގެ ބޭސްފަރުވާއަށާއި ތައުލީމު ފުރިހަމަ ކުރުމަށް އެހީތެރިކަން ފޯރުކޮށްދެއެވެ. މިގޮތުން މިދިޔަ މަހުގައި ވެސް އެ ފަންޑުން ބޭނުންޖެހިފައިވާ އެކި ފަރާތްތަކަށް އެހީގެ ގޮތުގައި 733،436.60 ރުފިޔާ ހަރަދުކޮށްފައިވާކަން ފާހަގަކޮށްލެވެއެވެ.

މި އެހީތެރިކަމުގެ ސަބަބުން ގިނަ އަދަދެއްގެ ތެލެސީމިއާ ކުދިންނަށާއި އެކުދިންގެ އާއިލާތަކަށް ލުުޔެއް ލިބިގެންދާނެ ކަމަށް އުއްމީދު ކުރެވޭކަމަށް މިނިސްޓަރު ވިދާޅުވިއެވެ.