މިދިޔަ އަހަރުގެ ޖުލައި މަހާ އަޅާބަލާއިރު މިއަހަރުގެ ޖުލައި މަހު މުދަލު ޒަކާތުގެ ގޮތުގައި ދައުލަތަށް ލިބުނު ފައިސާގެ އަދަދު 44.2 އިންސައްތަ އިތުރުވެ، 17.37 މިލިއަން ރުފިޔާ ޒަކާތު ފަންޑަށް ލިބިއްޖެއެވެ.

މިނިސްޓަރީ އޮފް ފައިނޭންސް އެންޑް ޕަބްލިކް އެންޓަޕްރައިސަސްގެ އެސްއޭޕީ ނިޒާމުގެ ރެކޯޑުތަކުން ދައްކާ ގޮތުގައި 2025 ވަނަ އަހަރުގެ ޖުލައި މަހު މުދަލު ޒަކާތުގެ ގޮތުގައި ލިބިފައިވަނީ 12,040,524.09 ރުފިޔާއެވެ. ނަމަވެސް 2026 ވަނަ އަހަރުގެ ޖުލައި މަހު މި އަދަދު ވަނީ 17,366,787.29 ރުފިޔާއަށް އަރާފައެވެ.

މިއީ އަހަރުން އަހަރަށް ބަލާއިރު ގާތްގަނޑަކަށް 5.33 މިލިއަން ރުފިޔާގެ ކުރިއެރުމެކެވެ.

މުދަލު ޒަކާތުގެ ގޮތުގައި ލިބުނު އަދަދު އިތުރުވެފައިވާއިރު، ޖުލައި މަހުގެ ތެރޭގައި ޒަކާތު ފަންޑުން ވަނީ ޖުމްލަ 2.80 މިލިއަން ރުފިޔާ އެކި ކަންކަމަށް ދޫކޮށްފައެވެ. 

މިގޮތުން ޒަކާތު ފަންޑުން ދޫކުރެވުނު ފައިސާގެ ތެރެއިން އެންމެ ބޮޑު ބައެއް ހަރަދުކޮށްފައިވަނީ ފަގީރުންނާއި މިސްކީނުންގެ ބަޔަށެވެ. އެގޮތުން އެ ބަޔަށް 1.75 މިލިއަން ރުފިޔާ ދޫކޮށްފައިވާއިރު، އޭގެ ތެރޭގައި ބޭސްފަރުވާގެ އެހީގެ ގޮތުގައި ދޫކުރި 1.48 މިލިއަން ރުފިޔާއާއި، ބޯހިޔާވަހިކަމުގެ އަސާސީ ބޭނުންތަކަށް ދޫކުރި 155,950 ރުފިޔާގެ އިތުރުން އެހެނިހެން ޒަރޫރީ ބޭނުންތަކަށް ދޫކުރި 115,250 ރުފިޔާ ހިމެނެއެވެ.