ބުޅާ މަހުން ކާބޯތަކެތި ހަދައިގެން ވިއްކި ކަމަށް ތުހުމަތު ކުރެވޭ ބިދޭސީ މީހާ އުޅުނު ތަނުގައި ހުރި މަސްތަކުން ނެގި ސާމްޕަލްގެ ނަތީޖާ އަދިވެސް ނުލިބޭ ކަމަށް މޯލްޑިވްސް ފުޑް އެންޑް ޑްރަރަގް އޮތޯރިޓީ (އެމްއެފްޑީއޭ) އިން މިއަދު ބުނެ ބުނެފިއެވެ.
އެމްއެފްޑީއޭގެ އޮފިޝަލަކު ވިދާޅުވި ގޮތުގައި ރާއްޖެއިން ބޭރަށް ފޮނުވި ސާމްޕަލްގެ ނަތީޖާ އަދި ނުލިބޭ ކަމަށާއި، ނަތީޖާ ލިބޭނެ ވަކި އިރެއް ވެސް ނޭނގޭ ކަމަށް ވަނީ ބުނެފައެވެ. އެ ސާމްޕަލް ތަހުލީލު ކުރަން ފޮނުވި ގައުމުގެ މައުލޫމާތު ވެސް އަދި ހާމަކޮށްފައެއް ނުވެއެވެ.
މި މައްސަލައައާ ގުޅިގެން ބަންގްލަދޭޝްގެ ރައްޔިތެއް ކަމަށްވާ އަރަފާތު ހޮސެއިން ވަނީ ހައްޔަރުކޮށްފައެވެ. އޭނާ ދިރިއުޅުނު ގޭގެ ފްރިޖުން ނެގި ސާމްޕަލްތަކެއް ވަނީ ތަހުލީލު ކުރުމަށް ރާއްޖެއިން ބޭރަށް ފޮނުވާފައެވެ.
މި މައްސަލައާ ގުޅޭ ގޮތުން މިދިޔަ މަހު ބޭއްވި ނޫސްވެރިންގެ ބައްދަލުވުމެއްގައި ހެލްތު މިނިސްޓަރު ޑރ. އަބްދުﷲ ހަލީލް ވިދާޅުވެފައިވަނީ ބުޅާ މަހުން ކާބޯތަކެތި ހަދައިގެން ވިއްކި ކަން އަދި ޔަގީން ނުވާ ކަމަށެވެ. އެ މައްސަލަ ބަލަމުން އަންނަ ކަމަށާއި، ބުޅާ މަހުން ކާބޯތަކެތި ހެދިކަން އެނގޭނީ ތަހުލީލުތަކަށް ފަހު ކަމަށް މިނިސްޓަރު ވިދާޅުވިއެވެ.
"އެގޮތަށް ބުޅާމަސް ބޭނުންކުރި ކަމެއް އަދި އެނގިފައެއް ނެތް. އަދި ސޯޝަލް މީޑިއާގައި ދެކެވޭ ވާހަކައެއް ހުރީ. އެހެންވީމާ އަދި އަޅުގަނޑުމެންނަކަށް ކަށަވަރެއް ނުވޭ. އެކަމަކު އެކަމާ ގުޅޭ ތަހުލީލުތައް އެބަ ކުރަން. އެ ތަހުގީގުގެ އަލީގައި އެނގޭނެ މިއީ ކިހާ ފުންމިނަކަށް ގޮސްފައި އޮތް ކަމެއްކަން،" މިނިސްޓަރު ވިދާޅުވިއެވެ.
މި މައްސަލަ ފެންމަތިވީ އާންމު މީހަކު ސޯޝަލް މީޑިއާގައި އާންމުކުރި ވީޑިއޯއަކާ ގުޅިގެންނެވެ. އެ ވީޑިއޯގައި އަރަފާތު ބުޅާތައް ގިނައިން އުޅޭ ސަރަހައްދެއްގައި ޕްލާސްޓިކް ކޮތަޅެއް ހިފައިގެން ހުރި ތަން ފެނެއެވެ. އޭނާ ބުނި ގޮތުގައި އެއީ ބުޅާތައް ގެއަށް ގެންދިއުމަށް ކުރާ ކަމެކެވެ.
މި މައްސަލަ ފެންމަތިވުމާ ގުޅިގެން އަރަފާތު ފިލައިގެން އުޅެނިކޮށް، މިދިޔަ މަހުގެ ފަހުކޮޅު ސިފަ ބަދަލުކުރަން ސެލޫނަކަށް ވަދެ ހުއްޓާ އިމިގްރޭޝަނާއި ފުލުހުން ގޮސް ވަނީ އޭނާ ހައްޔަރުކޮށްފައެވެ. މިހާރު އޭނާ ހުރީ އިމިގްރޭޝަނުގެ ބެލުމުގެ ދަށުގައެވެ. އިމިގްރޭޝަނުން ބުނާ ގޮތުގައި އޭނާ ޑީޕޯޓްކުރާނީ އޭނާގެ މައްޗަށް ޖިނާއީ ކުށެއްގެ ހެކި ހުރިތޯ ބެލުމަށް ފުލުހުން ކުރިއަށް ގެންދާ ތަހުގީގު ނިމުމުންނެވެ.
މި މައްސަލަ ފެންމަތިވުމާ ގުޅިގެން ގިނަ ބަޔަކު ވަނީ އަރަފާތު ދިރިއުޅެމުންދިޔަ ތަނަށް ވަދެ ފޮޓޯ ނަގައި އާންމުކޮށްފައެވެ. އެ ފޮޓޯތަކުން އެތަނުގައި ބުޅާ މަސް ހުރިކަން ޔަގީން ނުވިޔަސް، ފްރިޖު ތެރޭގައި ކުކުޅު މަހާއި ކަނޑުގެ މަހުގެ ބާވަތްތައް ހުރި ތަން ފެނުނެވެ.
މި މައްސަލައިގައި އަރަފާތު ބުޅާ މަހުން ކާތަކެތި ހަދައިގެން ވިއްކި ކަމަށް ވާހަކަ ދެކެވުނު ނަމަވެސް، އެކަން އަދި ޔަގީން ނުކުރެވޭ ކަމަށް ސަރުކާރުގެ ކަމާބެހޭ އިދާރާތަކުން ބުނެއެވެ. އެމްއެފްޑީއޭއިން ބުނާ ގޮތުގައި ރާއްޖެއިން ބޭރަށް ފޮނުވާފައިވާ ސާމްޕަލްތަކުގެ ނަތީޖާ ލިބުމުން މި މައްސަލައިގެ ޙަޤީޤަތް އިތުރަށް ސާފުވެގެންދާނެއެވެ.
މި މައްސަލައާ ގުޅިގެން ސަރުކާރުގެ ކަމާބެހޭ އިދާރާތަކުން ތަހުޤީޤު ކުރިއަށް ގެންދާއިރު، އާންމުންގެ ފަރާތުން ވެސް މި މައްސަލައާ މެދު ކަންބޮޑުވުން ވަނީ ފާޅުކޮށްފައެވެ. ގިނަ ބަޔަކު ގޮވާލަނީ މިފަދަ މައްސަލަތައް ހުއްޓުވުމަށް ކަމާބެހޭ ފަރާތްތަކުން އަވަސް ފިޔަވަޅުތަކެއް އެޅުމަށެވެ.
