ވައިގެ މަގުން ރާއްޖެ އެތެރެ ކުރަން އުޅުނު 3.5 ކިލޯއަށް ވުރެ ގިނަ މަސްތުވާތަކެތި ކަސްޓަމްސް އިން އަތުލައިގެންފިއެވެ. ކަސްޓަމްސް އިން ހާމަކުރި ގޮތުގައި މި މަސްތުވާތަކެތި އަތުލައިގަތީ އިއްޔެ ރާއްޖެ އައި އެއާ ކާގޯ ޝިޕްމަންޓަކާއި ހަމަ އެ ދުވަހު ރާއްޖެ އައި މެލޭޝިއާ އެއާލައިންސް ފްލައިޓް ނަންބަރު އެމްއެޗް485 އިން ދަތުރު ކުރި ދިވެހި ފަސެންޖަރަކު ބަލައި ފާސް ކުރުމުގެ ތެރޭގައެވެ.

މަސްތުވާތަކެތި ކަމަށް ޝައްކު ކުރެވޭ ތަކެތި ފެނުމުން ފުރަތަމަ މަރުހަލާގައި ކަސްޓަމުން މި ތަކެތި ތަހުލީލު ކުރިއިރު، މަސްތުވާތަކެތީގެ ތިން ބާވަތަކަށް ފައްސިވެފައިވާ ކަމަށް ކަސްޓަމްސް އިން ހާމަކުރެއެވެ. އެގޮތުން އެއާ ކާގޯއިން 3010.00 ގްރާމްގެ ހެރޮއިން އަދި ދިވެހި ފަސިންޖަރު އަތުން 48 ގްރާމްގެ ހެރޮއިން ފެނުނެވެ. މީގެ އިތުރުން 315.00 ގްރާމްގެ މެތުއެމްފެޓަމިން އަދި 215.00 ގްރާމްގެ ސިންތެޓިކް ކެތިނޯން ވެސް ފެނިފައިވެއެވެ. މި ހުރިހާ މަސްތުވާތަކެތީގެ ޖުމްލަ ބަރުދަނަކީ 3588.00 ގްރާމެވެ.

މި މައްސަލަތައް ތަހުގީގު ކުރުމަށްޓަކައި ފަސެންޖަރާއި އަތުލައިގަނެވުނު ތަކެތި މިހާރު ވަނީ ދިވެހި ފުލުހުންގެ ހިދުމަތާ ހަވާލުކޮށްފައެވެ. މި ހާދިސާއާ ގުޅިގެން އިތުރު ތަފްސީލު ލިބުމުން އާންމުކުރާނެ ކަމަށް ކަސްޓަމްސްއިން ބުނެފައިވެއެވެ.

ރާއްޖެއަށް މަސްތުވާތަކެތި އެތެރެކުރަން އުޅޭ މައްސަލަތައް އިތުރުވަމުން ދާއިރު، ކަމާބެހޭ އިދާރާތަކުން މިފަދަ މައްސަލަތައް ހުއްޓުވުމަށް ގަދައަޅައި މަސައްކަތް ކުރަމުންދާކަން ފާހަގަކުރެވެއެވެ. މި ކާމިޔާބީއަކީ ރާއްޖޭގެ މަސްތުވާތަކެތީގެ ވަބާއާ ދެކޮޅަށް ކުރެވޭ މަސައްކަތުގައި ލިބުނު މުހިންމު ކުރިއެރުމެއް ކަމަށް ކަސްޓަމްސް އިން ބުނެފައިވެއެވެ.