ވޯލްޑް ބޭންކުން މިއަދު ނެރުނު 'ކަންޓްރީ ކްލައިމެޓް އެންޑް ޑިވެލޮޕްމަންޓް ރިޕޯޓް' (ސީސީޑީއާރު) ގައި ވަނީ މޫސުމަށް އަންނަ ބަދަލުތަކުގެ ސަބަބުން ރާއްޖޭގެ މަސްވެރިކަމާއި ފަތުރުވެރިކަމަށް ކުރިމަތިވެފައިވާ ނުރައްކާތައް ފާހަގަކޮށްފައެވެ. މި ދެ ދާއިރާއަކީ ޤައުމުގެ ޖީޑީޕީ އާއި ވަޒީފާގެ ގާތްގަނޑަކަށް ދެބައިކުޅައެއްބައި ހިއްސާކުރާ ދާއިރާތަކެވެ.
ރިޕޯޓުގައި ވަނީ ފަރުތަކާއި މަސްވެރިކަމަށް މިހާރުވެސް ކުރަމުންދާ އަސަރުތައް މެދުރާސްތާގައި އިތުރަށް ގޯސްވާނެކަމުގެ އިންޒާރު ދީފައެވެ. އަދި މިކަމުގެ ސަބަބުން ދިވެހިރާއްޖޭގެ އިޤްތިޞާދަށާއި ތިމާވެއްޓަށް ނޭދެވޭ އަސަރުތަކެއް ކުރާނެކަން ފާހަގަކޮށްފައިވެއެވެ.
ވޯލްޑް ބޭންކުން ލަފާކޮށްފައިވާ ގޮތުގައި ދުނިޔޭގެ ޖައްވުގެ ހޫނުމިން ދެ ޑިގްރީ ސެލްސިއަސްއަށްވުރެ މަތިވެއްޖެނަމަ ހުރިހާ ފަރުތަކެއްހެން ނެތިގެން ހިނގައިދާނެއެވެ. އަދި 2100 ވަނަ އަހަރާ ހަމައަށް ކަނޑުގެ ލޮނުގަނޑު 0.9 މީޓަރަށް އުފުލިދާނެކަމަށް ލަފާކޮށްފައިވެއެވެ.
މި ނުރައްކާތަކަށް ހައްލު ހޯދުމަށްޓަކައި، ރިޕޯޓުގައި ވަނީ މޫސުމަށް އަންނަ ބަދަލުތަކަށް އެކަށީގެންވާ ގޮތަށް ހަރަކާތްތެރިވުމަށް މުހިންމު މަގުތަކެއް ފާހަގަކޮށްފައެވެ. މީގެ ތެރޭގައި މަސްވެރިކަމާއި ފަތުރުވެރިކަން ރައްކާތެރި ކުރުމަށާއި އިޤްތިޞާދުގެ ހަރުދަނާކަން ކަށަވަރުކުރުމަށް ބޭނުންވާ މާލީ އިސްލާހުތައް ހިމެނެއެވެ.
