ކުޑަކުދިންގެ ޒާތީ މަޢޫލޫމާތު ދެނެގަނެވޭނެ ފޮޓޯ އަދި ވީޑިއޯ އާންމުނުކުރުމަށް އިޖްތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އިލްތިމާސްކޮށްފިއެވެ.
އެ ވުޒާރާއިން ނެރުނު ނޫސްބަޔާނެއްގައި ބުނީ ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު، ޤާނޫނު ނަންބަރު 2019/19 ގެ 33 ވަނަ މާއްދާގައި ކުޑަކުދިންގެ ކަރާމާތަށް އުނިކަން އަންނަ ގޮތަކަށް ކުޑަކުދިންގެ ޒާތީ މަޢުލޫމާތު އެއްވެސް ފަރާތަކުން ޢާންމުކޮށްގެން ނުވާނެ ކަމަށާއި ކުށުގެ ތުހުުމަތުވާ ކުދިންނާއި، ކުށުގެ ޝިކާރައަކަށްވެފައިވާ ކުދިންނާއި އެނޫންވެސް ސަބަބަކަށްޓަކައި އަޅާލުމާއި ރައްކާތެރިކަން ބޭނުންވާ ކުދިންގެ ނަމާއި، އެޑްރެހާއި، ތަޢުލީމު ޙާޞިލް ކުރާތަނުގެ މަޢުލޫމާތު ފަދަ ޒާތީ މަޢުލޫމާތެއް ނުވަތަ އެކުދިންގެ ތަސްވީރެއް، ނުވަތަ ސީދާ ގޮތުން ނުވަތަ ނުސީދާ ގޮތުން ނަމަވެސް ކުއްޖާއަކީ ކާކުކަން ދެނެގަނެވޭނެ ފަދަ އެއްވެސް މަޢުލޫމާތެއް މީޑިއާގައި ނުވަތަ އެނޫންވެސް ވަޞީލަތެއްގައި ޝާއިޢުކޮށްގެން ނުވާނެ ކަން ބަޔާންކޮށްފައިވާ ކަމަށެވެ.
ޢާއިލީ ތަރައްޤީއާ ބެހޭ ވުޒާރާއިން މި ނޫސްބަޔާން ނެރެފައިވަނީ ދެ ދަރިންނާ ބެހުނު ބައްޕައެއްގެ މައްސަލައެއް ފެންމަތިވެފައި ވަނިކޮށެވެ.
Advertisement
ވުޒާރާގެ ނޫސްބަޔާނުގައި ބުނެފައިވަނީ ކުދިންގެ ބައްޕަގެ ފޮޓޯ އާންމުކުރުމަކީ ނުސީދާގޮތުން ނަމަވެސް އެ ކުދިންނަކީ ކޮން ބައެއްކަން އާންމުންގެ ތެރެއިން ބަޔަކަށް އެނގި، އެކަމުގެ ސަބަބުން އެކުދިންނަށް ނަފްސާނީ ގޮތުން އިތުރު ގެއްލުންތައް ލިބި ކުދިންގެ ކަރާމާތަށް އުނިކަން ލިބިގެންދާނެ ކަމެއް ކަމަށެވެ.
އެގޮތުން އެ ސަބަބުތަކަށްޓަކައި، ކުދިންގެ ކަރާމާތަށް އުނިކަމެއް ލިބިގެންދާނެ އެއްވެސް ކަމެއް ވިޔަ ނުދިނުމަށްޓަކައި އެފަދަ ފޮޓޯތައް ދައުރުނުކުރުމަށް އެ ވުޒާރާއިން ވަނީ އިލްތިމާސްކޮށްފައެވެ.
މީގެ އިތުރުން ކުއްޖަކަށް އެއްވެސް ބާވަތެއްގެ އަނިޔާއެއް ލިބޭކަން އެނގޭނަމަ އިޖްތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ޗައިލްޑް ހެލްޕްލައިން 1412 އަށް ގުޅައި ރިޕޯޓުކުރުމަށް އެ ވުޒާރާއިން ވަނީ އެދިފައެވެ.
